Qazaqstannyń Túrkııadaǵy dıplomatııalyq ókildikterinde memlekettik týlar jartylaı túsirildi

Kostenko atyndaǵy shahtada jumysshylardyń qaza bolýyna baılanysty 29 qazan elimizde Ulttyq aza tutý kúni bolyp jarııalanǵan bolatyn.  Osyǵan baılanysty Qazaqstannyń Túrkııadaǵy dıplomatııalyq ókildikterinde memlekettik týlar jartylaı túsirildi, dep habarlaıdy Kazinform.

Negizgi memlekettik rámizder 29 qazanǵa qaraǵan túni Ankara ýaqyty boıynsha 21.00-den bastap túsirildi, bul Astana ýaqyty boıynsha 00.00-ge sáıkes keledi. 

Qazaqstannyń Túrkııadaǵy Elshiligine jergilikti azamattar men basqa elderdiń ókilderi kelip, qoldaý bildirip, kóńil aıtý kitabyna jazba qaldyryp jatyr. 

Túrkııada ulttyq mereke – Respýblıka kúni atalyp ótse de, halqymyzdyń muńyn bólisý maqsatynda túrik saıasatkerleri men qoǵam qaıratkerleri de Qazaqstan elshiligine keledi. 

Kóńil aıtqysy keletinder úshin Qazaqstan Elshiliginiń esigi 30 qazanǵa deıin saǵat 10.00-den 18.00-ge deıin ashyq.