Qazaqstannyń týrıstik maýsymy naýryzda ótetin eki mańyzdy is-sharamen ashylady
ASTANA. KAZINFORM – Qazaqstanda týrıstik maýsym bıylǵy naýryzda eldiń mádenı-týrıstik oqıǵalar kúntizbesine engen eki mańyzdy is-sharamen ashylady. Bul is-sharalar óńirlerdiń mádenı jáne gastronomııalyq baılyǵyn tanystyryp, el turǵyndary men qonaqtary úshin tartymdy ortalyqqa aınalady.
Negizgi is-sharalardyń biri – Mańǵystaý oblysy ákimdigi uıymdastyratyn «Amal keldi – jyl keldi» mádenı merekesi. Mereke dástúr boıynsha Naýryz meıramynan bir kún buryn Otpan taý kıeli kesheniniń aýmaǵynda ótedi. Іs-shara birlik, sabaqtastyq jáne rýhanı jańǵyrý qundylyqtaryn dáripteıdi. Baǵdarlamada ulttyq oıyndar, kontserttik qoıylymdar, qolóner kórmeleri, sondaı-aq kıiz úılerde dástúrli taǵamdar usynylady.
Merekeniń basty rásimi – jańa ómirlik kezeńniń bastalýyn jáne qoǵamnyń toptasýyn bildiretin birlik otyn jaǵý dástúri. Atalmysh is-shara 13 naýryzda ótedi.
Sonymen qatar naýryz aıynda Shymkent qalasy ákimdiginiń uıymdastyrýymen qalada «Dastarhan» gastronomııalyq festıvali ótedi. Festıval gastronomııalyq týrızmdi damytýǵa, jergilikti qoǵamdyq tamaqtaný oryndaryn qoldaýǵa jáne óńirdiń gastronomııalyq ózindik ereksheligin nasıhattaýǵa baǵyttalǵan. Baǵdarlama aıasynda taǵamdardan dám tatý, aspaz sheberleriniń sheberlik sabaǵy, baıqaýlar men mádenı-oıyn-saýyq is-sharalary ótkiziledi. Bul bıznes ókilderi men qala qonaqtarynyń ózara baılanysyn nyǵaıtatyn ashyq alań qalyptastyrady. Bul festıval 21 naýryz kúni ótedi dep josparlanyp otyr.
Aıta keteıik, buǵan deıin Týrızm jáne sport mınıstrligi 2026 jylǵa arnalǵan mádenı-týrıstik is-sharalar kúntizbesin daıyndaǵan bolatyn. Onda el boıynsha 55 iri is-shara qamtylǵan. Kúntizbe mádenı, etnomádenı, sporttyq, gastronomııalyq jáne ekologııalyq is-sharalardy qamtyp, ishki týrızmdi yntalandyrýǵa, týrıstik marshrýttardy keńeıtýge jáne óńirlik brendterdi nasıhattaýǵa baǵyttalǵan.
Buǵan deıin habarlaǵanymyzdaı, naýryz aıynda qos merekemen qatar elimizdiń ári turǵynynyń ómirine tikeleı áseri bar birqatar mańyzdy ózgeris bolady.
