Qazaqstannyń týrıstik kartasy ózgeredi: Air Astana men bes óńir kúsh biriktirdi
ASTANA. KAZINFORM — Qazaqstan sheteldik týrıster úshin tartymdy baǵytqa aınaldyrý jolyndaǵy qadamyn kúsheıtti. Air Astana, Kazakh Tourism jáne bes óńir kúsh biriktirip, halyqaralyq naryqta Qazaqstannyń týrıstik áleýetin keńinen tanytýǵa kiristi. Bul týraly «Kazakh Tourism» UK» málim etti.
21 qyrkúıekte Almatyda «Eır Astana» AQ, «Kazakh Tourism» UK» AQ jáne Qazaqstannyń bes oblysy 2027 jylǵa arnalǵan strategııalyq yntymaqtastyq týraly kelisimge qol qoıdy. Bul seriktestiktiń maqsaty — kirý týrızmin damytýdy qoldaýda sınergeıalyq áser qalyptastyrý, jolaýshylar legin ulǵaıtý jáne Qazaqstannyń halyqaralyq naryqtaǵy ornyn nyǵaıtý.
Kelisimge Air Astana, Kazakh Tourism, Astana men Almaty ákimdikteri, sondaı-aq Almaty, Aqmola jáne Mańǵystaý oblystary qol qoıdy. Taraptar Qazaqstandy týrıstik baǵyt retinde ilgeriletý jónindegi birlesken bastamalardy iske asyrý úshin ózderiniń marketıngtik, kommýnıkatsııalyq jáne uıymdastyrýshylyq resýrstaryn biriktiredi.
Yntymaqtastyq digital naýqandardy ótkizýdi, iri halyqaralyq kórmeler men roýd-shoýlarǵa qatysýdy, halyqaralyq seriktester men BAQ ókilderi úshin tanysý saparlaryn, B2B is-sharalaryn, sondaı-aq basym naryqtardy birlesip taldaýdy qamtıtyn bolady.
— Sheteldik meımandardy tartý — bul eń aldymen birlesken eńbektiń nátıjesi. Múmkindikterimizdi ulttyq áýe kompanııasymen jáne óńirlermen toǵystyrý arqyly biz syrtqy naryqta Qazaqstannyń tanymaldylyǵyn arttyramyz, — dep atap ótti «Kazakh Tourism» UK» AQ Basqarma tóraǵasy Talǵat Ǵazızov.
Onyń pikirinshe, bul qadam elimizge saıahatshylardyń turaqty kelýin qamtamasyz etip, aımaqtardaǵy qyzmet kórsetý salasy men bıznestiń órkendeýine jol ashady
— Bizdiń maqsatymyz – Qazaqstanǵa halyqaralyq áýe tasymaldarynyń artýymen qatar, kirme týrızmdi de birlesip damytý, — dedi Air Astana kompanııalar tobynyń bas atqarýshy dırektory Ibrahım Janlyel.
Air Astana ókiliniń aıtýynsha, Qazaqstandy sheteldik saıahatshylar úshin qoljetimdi etý, baı mádenı mura men kórikti jerlerdiń ártúrliligi týraly habardarlyqty arttyrý, sondaı-aq Qazaqstandy týrıstik baǵyt retinde ilgeriletýdi josparlap otyr.
— Kazakh Tourism jáne óńirlermen tyǵyz yntymaqtastyqtyń arqasynda biz halyqaralyq marketıngtik is-sharalarda sınergııaǵa qol jetkize alamyz, Qazaqstandy jáne Air Astana jelisin neǵurlym tıimdi ilgeriletemiz, sondaı-aq qonaqtarymyzdyń saıahatynyń barlyq kezeńinde álemdik deńgeıdegi servısti qamtamasyz ete alamyz, — deıdi ol.
Al týrızmdi memlekettik qoldaý baǵytynda qandaı ózgeris engizilip jatqanyn myna siltemeden oqyńyz.
