Qazaqstannyń tuńǵysh Olımpıada chempıony jeke zattaryn mýzeıge tabystady
ASTANA. KAZINFORM – Búgin Qazaqstan tarıhyndaǵy tuńǵysh Olımpıada chempıony Vladımır Smırnov QR Prezıdent ortalyǵyndaǵy Qazaqstan sportynyń Dańq mýzeıine jeke zattaryn tartý etti.
QR Sportty damytý dırektsııasy málim etkendeı, 1994 jyly Lıllehammerdegi XVII qysqy Olımpıadada Qazaqstan táýelsiz el retinde alǵash ret qatysyp, Vladımır Smırnov 50 shaqyrymdyq (klassıkalyq stıl) jarysta chempıon atanǵan edi.
«Bul bizdiń egemen el retinde barǵan alǵashqy olımpııa oıyndarymyz, birinshi altyn júldemiz bolatyn. Ózimdi sol úshin maqtan tutamyn. Sodan beri arada 30 jyl ótipti. Keshe Şýchınsk qalasynda arnaıy is-shara ótti. Búgin sondaǵy mektep oqýshylary maǵan jyly lebizin aıtyp, zor qýanysh syılady. Osy mýzeıge kelýshiler kóp bolǵanyn qalaımyn. Bizdiń zattarymyz arqyly olar sol jarys jaıly kóbirek bile alady», - dedi Olımpıada jeńimpazy.
Qazir Qazaqstan sportynyń Dańq mýzeıinde Serik Sapıevtiń London Olımpıadasyndaǵy bylǵary qolǵaby, Aleksandr Vınokýrovtyń jeıdesi men velosıpedi, Dmıtrıı Balandınniń Rıo Olımpıadasyndaǵy sport kıimi, Dáýlet Turlyhanovtyń medaldary, Denıs Tenniń Sochı Olımpıadasyndaǵy kostıými, Danııar Eleýsinovtiń shlemi men kıimi, Gennadıı Golovkınniń altyn belbeýleri jáne ózge de zattar qoıylǵan.
