Qazaqstannyń tsırk ártisteri halyqaralyq festıvaldiń jeńimpazy atandy
ALMATY. KAZINFORM — Qazaqstan ónerpazdary Jasmına Alshynbaeva men Avelına Gýzeı Reseıdiń Saratov qalasynda ótken XI Halyqaralyq tsırk óneri festıvaliniń eń joǵary marapaty — «Altyn tájdiń» ıegeri atandy.
2005 jyldan beri ótkizilip kele jatqan bul aıtýly jarys álemniń túkpir-túkpirinen tsırk sahnasynyń úzdik ókilderin jınap, tsırk óneriniń damýyna áıelderdiń qosqan úlesin erekshe atap ótedi. Bıyl Reseıdiń eń kóne tsırki — aǵaıyndy Nıkıtınder atyndaǵy Saratov memlekettik tsırk arenasynda AQSh, Meksıka, Qytaı, Vetnam, Ispanııa, Qazaqstan — barlyǵy 13 eldiń ókilderi óner kórsetti.
Qazaqstan atynan Qazaq memlekettik tsırkiniń ártisteri — Jasmına Alshynbaeva men Avelına Gýzeı qatysty. Olar qoıýshy-rejısser Zarına Tapalovanyń jetekshiligimen alǵash ret «Áýe sferasy» dep atalatyn «saqınada juptasa óner kórsetý» janry boıynsha nómir usyndy. Áserli qoıylym halyqaralyq qazylar alqasy men kórermenderdi tánti etip, ónerpazdar festıvaldiń bas júldesin ıelendi.
— Biz bul nómirdi birneshe aı boıy daıyndadyq, ár qımylymyzdy ábden ushtadyq. Bul óte jaýapty sát boldy: premera, jańa sahna, halyqaralyq qazylar alqasy. Biraq kúmbez astyna shyqqan sátte qobaljý sezimi shabytqa aýysty. Bul bizdiń juldyzdy sátimiz boldy, — dedi Jasmına Alshynbaeva.
Eske salaıyq, buǵan deıin Almaty tsırkiniń ártisteri Gınnes rekordtar kitabyna engenin jazǵanbyz.
https://kaz.inform.kz/news/almati-tsirknn-artster-ginnes-rekordtar-ktabina-end-f38611/