Qazaqstannyń tsıfrlyq transformatsııasy ınvestıtsııalyq tartymdylyqty arttyrýǵa yqpal etip otyr — Erlan Dosymbekov
ASTANA. KAZINFORM — Jasandy ıntellekt pen tsıfrlyq egemendik taqyryby Qazaqstannyń tsıfrlyq transformatsııa baǵytynda bir jyl ishinde qol jetkizgen nátıjelerin kórsetedi. Bul týraly Qazaqstan Respýblıkasy janyndaǵy Sheteldik ınvestorlar keńesiniń 38-plenarlyq otyrysynda «Qazaqstandyq sheteldik ınvestorlar keńesi» qaýymdastyǵy basqarmasynyń tóraǵasy Erlan Dosymbekov aıtty.
Onyń sózinshe, «Tsıfrlyq Qazaqstan» strategııasy aıasynda jasandy ıntellekt ekonomıkalyq saıasattyń basym baǵytyna aınalyp, strategııalyq mindetterdi iske asyrý kezeńi bastaldy.
— Osy baǵyttaǵy jumysty úılestiretin Jasandy ıntellekt jáne tsıfrlyq damý mınıstrliginiń qurylýy Qazaqstannyń óńirlik jasandy ıntellekt haby retinde qalyptasýyna jáne jahandyq básekege qabilettiligin arttyrýǵa múmkindik berip otyr, — dedi Erlan Dosymbekov.
Sondaı-aq ol ınvestıtsııalyq ahýaldy jaqsartý baǵytynda qolǵa alynǵan sharalarǵa toqtaldy.
— Bas prokýratýra janynan Investorlardyń quqyqtaryn qorǵaý komıtetiniń qurylýyn erekshe atap ótken jón. Bas prokýrordyń ınvestorlar ombýdsmeni retindegi qyzmeti ınvestorlardyń quqyqtaryn qorǵaýdy kúsheıtip, Qazaqstannyń ınvestıtsııalyq ortasyna degen senimdi odan ári nyǵaıtady dep senemiz, — dedi ol.
Budan bólek, Erlan Dosymbekov Sheteldik ınvestorlar keńesiniń birlesken jumys toptarynyń qyzmeti nátıjesinde sheteldik ınvestorlar kótergen birqatar másele boıynsha naqty ilgerileýshilikke qol jetkizilgenin aıtty.
Sonymen birge, onyń sózinshe, ınvestıtsııalyq ahýaldy odan ári jaqsartý úshin qosymsha nazar aýdarýdy qajet etetin máseleler de bar. Osyǵan baılanysty jumys toptary memlekettik organdardyń qaraýyna birqatar usynys joldaǵan.
Buǵan deıin Qazaqstannyń biregeı geosaıası orny onyń bolashaq damý múmkindikterin aıqyndaıtynyn jazǵanbyz.
