Qazaqstannyń tsıfrlyq tájirıbesi Grýzııanyń qyzyǵýshylyǵyn týdyrdy
ASTANA. KAZINFORM – «Azamattarǵa arnalǵan úkimet» memlekettik korporatsııasy men Grýzııanyń Ádilet úıi memlekettik qyzmetterdi damytýǵa jáne halyqpen jumys isteý tetikterin jetildirýge baǵyttalǵan yntymaqtastyq týraly memorandýmǵa qol qoıdy. Qujat taraptardyń praktıkalyq tájirıbe almasý jáne azamattardyń qazirgi suranystaryna saı tıimdi sheshimder ázirleý úshin kúsh-jiger biriktirýge nıetti ekenin aıǵaqtaıdy.
Yntymaqtastyqtyń negizgi baǵyttary qatarynda halyqqa qyzmet kórsetý ortalyqtarynyń jumysyn uıymdastyrýdaǵy úzdik tájirıbelermen almasý, jasandy ıntellekt, robottandyrý jáne protsesterdi avtomattandyrý tehnologııalaryn paıdalanyp, tsıfrlyq qyzmetterdi damytý bar. Sondaı-aq zamanaýı qyzmet kórsetý standarttaryn engizý arqyly klıenttik tájirıbeni jetildirýge erekshe nazar aýdarylady.
Memorandým kadrlyq áleýetti damytý máselesin de qamtıdy. Taraptar birlesken bilim berý baǵdarlamalaryn júzege asyrýǵa, qyzmetkerlerdiń biliktiligin arttyrýǵa, sondaı-aq taǵylymdamalar men oqytý is-sharalaryn uıymdastyrýǵa nıetti. Budan bólek, ózara qyzyǵýshylyq týdyratyn birlesken zertteý jáne taldaý jobalaryn qoldaýǵa erekshe kóńil bólinedi.
Aıta keteıik, eki kúndik saparda qazaqstandyq delegatsııa Grýzııanyń Ádilet úıinde bolyp, halyqqa qyzmet kórsetý ortalyqtarynyń jumysymen, qoldanystaǵy tsıfrlyq sheshimdermen jáne klıentter aǵynyn basqarý júıesimen tanysty. Sondaı-aq Grýzııa Іshki ister mınıstrliginiń Servıstik agenttiginde jáne Grýzııanyń Ádilet oqý ortalyǵynda kezdesýler ótip, yntymaqtastyq keleshegi talqylandy.
Búginde Qazaqstan memlekettik qyzmetterdi tsıfrlyq transformatsııalaý baǵytynda eleýli tájirıbe jınaqtap, aıtarlyqtaı nátıjege qol jetkizgen elderdiń qatarynda. Elektrondy jáne proaktıvti qyzmetterdiń engizilýi memleket pen azamattar arasyndaǵy ózara is-qımyldyń tıimdi modelin qalyptastyrýǵa múmkindik berdi. Osyǵan baılanysty Qazaqstannyń tájirıbesi men basqarýshylyq sheshimderi sheteldik áriptesterdiń de kásibı qyzyǵýshylyǵyn týdyryp otyr.
– Grýzııalyq áriptestermen memorandýmǵa qol qoıý – memlekettik qyzmetterdi damytý jolyndaǵy mańyzdy qadam. Biz úshin mundaı jumys saparlary men seriktestik erekshe mańyzdy. Olar basqa elderdiń ozyq tájirıbesin zerdeleýge, Qazaqstandaǵy memlekettik qyzmetterdi jetildirýge jáne jańa sheshimder engizýge múmkindik beredi, – dedi «Azamattarǵa arnalǵan úkimet» memlekettik korporatsııanyń basqarma tóraǵasy Arman Kenjeǵalıev.
Buǵan deıin Qazaqstan men Grýzııa ІІM kıberqylmysqa qarsy kúresti kúsheıtýge kelisken edi.
Eki el arasynda agroónerkásiptegi ózara saýda 116 mln dollarǵa jetken.
