Qazaqstannyń tsıfrlyq damý tájirıbesi EQQDB strategııasymen úndesedi — Odıl Reno-Basso
ASTANA. KAZINFORM — Eýropalyq qaıta qurý jáne damý bankiniń prezıdenti Odıl Reno-Basso Qazaqstan tsıfrlyq transformatsııada eleýli nátıjege qol jetkizgenin málimdedi. Onyń aıtýynsha, tsıfrlyq ınvestıtsııalar eldiń básekege qabilettiligin arttyryp, memlekettik qyzmet kórsetý júıesin jańǵyrtýdyń negizgi tetigine aınalyp otyr.
EQQDB basshysy tsıfrlyq ınvestıtsııalar básekege qabiletti arttyrýdyń negizgi tetikteriniń birine aınalyp, azamattarǵa memlekettik qyzmetter usyný tásilin túbegeıli ózgertip jatqanyn atap ótti. Qazaqstan úshin bul baǵyttyń áleýeti óte joǵary jáne eń bastysy, osy baǵyttaǵy jumysty alǵashqylardyń biri bolyp bastady.
— Búginde Qazaqstan BUU-nyń Elektrondyq úkimetti damytý ındeksinde álem boıynsha 24-orynda tur jáne bul kórsetkish boıynsha kóshbasshy elderdiń qataryna kiredi. Bul jetistiktiń negizinde ulttyq sýperkompıýterdiń iske qosylýy, derekterdi óńdeý ortalyqtarynyń damýy jáne Astana Hub bazasynda Halyqaralyq JI ortalyǵynyń qurylýy jatyr. Jalpy alǵanda, Digital Kazakhstan baǵdarlamasy, Astana Hub-qa salynǵan ınvestıtsııalar, halyqaralyq ІT-kompanııalarǵa berilgen salyqtyq jeńildikter jáne elektrondyq úkimetti júıeli túrde damytý ınnovatsııalardyń berik irgetasyn qalady, — dedi Odıl Reno-Basso QR Prezıdenti janyndaǵy Sheteldik ınvestorlar keńesiniń 38-otyrysynda, «Jasandy ıntellekt jáne tsıfrlyq egemendik: Qazaqstandaǵy ulttyq tehnologııalyq ekojúıelerdi damytý» sessııasynda.
Onyń aıtýynsha, Qazaqstannyń ulttyq tehnologııalyq ekojúıeni damytýǵa baǵyttalǵan umtylysy Eýropalyq qaıta qurý jáne damý bankiniń strategııalyq basymdyqtarymen tolyq úndesedi.
— Tsıfrlyq tehnologııalar men kıberqaýipsizdik — banktiń aldaǵy bes jylǵa arnalǵan strategııasynyń negizgi baǵyttarynyń biri. Biz olardy ekonomıkany jedel jańǵyrtýdyń jáne eldiń básekege qabiletin arttyrýdyń mańyzdy quraly dep sanaımyz. Banktiń óz ishinde de JI tehnologııalaryn belsendi engizip kelemiz. Bul bank ónimderi men ishki protsesterdi jetildiredi, syn-qaterdi basqarý júıesin kúsheıtedi jáne klıentterge kórsetiletin qyzmet sapasyn arttyrady. Jınaqtaǵan tájirıbemizdiń arqasynda Qazaqstanǵa, ásirese tsıfrlandyrýdy jaýapkershilikpen ári qaýipsiz júrgizý, JI quqyqtyq retteý jáne eldiń jahandyq qosylǵan qun tizbekterine kirigýi baǵyttarynda tıimdi qoldaý kórsete alamyz, — dedi Odıl Reno-Basso.
Aıta keteıik, Prezıdent Qasym-Jomart Toqaev Úkimettiń aldyna jańa ekonomıkalyq modelge kóshý mindetin qoıdy. Bıyl elimizde 200-den astam jańa óndiris oryndary ashylmaq. Bul ulttyq ekonomıkanyń odan ári damýyna, jańa jumys oryndaryn qurýǵa, qosylǵan quny joǵary ónim shyǵarýdy ulǵaıtýǵa eleýli serpin beredi.
EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin.
