Qazaqstannyń tranzıttik áleýeti: 2030 jylǵa deıin 21 logıstıkalyq ortalyq salynady
ASTANA. KAZINFORM – Qazaqstanda 2030 jylǵa deıin taǵy 21 logıstıkalyq ortalyq salý josparlanyp otyr. Qazir elimizde 46 logıstıkalyq ortalyq jumys isteıdi. Bul týraly Úkimet otyrysynda Kólik vıtse-mınıstri Talǵat Lastaev málimdedi.
Onyń aıtýynsha, Memleket basshysynyń Qazaqstandy Eýrazııadaǵy jetekshi logıstıkalyq ortalyqqa aınaldyrý tapsyrmasyn oryndaý aıasynda termınaldyq ınfraqurylymdy damytý jumystary bastaldy.
– Qazir elimizde 46 logıstıkalyq ortalyq jumys isteıdi. 2030 jylǵa deıin taǵy 21 ortalyq salý josparlanǵan. Sonymen qatar Qazaqstannyń tranzıttik dálizderin júkpen qamtamasyz etý úshin shetelderde de logıstıkalyq termınaldar jelisi keńeıip keledi. Qazir Lıanıýngan, Sıan, Potı qalalarynda 3 termınal jumys isteıdi. Taǵy 7 termınal boıynsha jumystar júrgizilip jatyr. Olar Selıatıno, Svısloch, Tashkent, Chendý, Alıat, Konstantsa qalalarynda jáne Majarstanda ornalasqan, – dedi Kólik vıtse-mınıstri.
Bul baǵyttaǵy jumystar negizinen «Qazaqstan temir joly» kompanııasy arqyly júzege asyrylady. Oǵan qosa, KTZ Express, «Kedentransservıs», OTLK, PTC Holding, «Istkomtrans», Atasu Group, «Astyq Trans» jáne Olzha Logistics sııaqty qazaqstandyq logıstıkalyq operatorlar da jumys isteıdi.
Keshe Prezıdent Q.Toqaev Qazaqstannyń tranzıttik áleýetin synǵa alǵan edi.
Elde kólik salasyn tsıfrlandyryp, ishki jáne halyqaralyq tasymalda qaǵaz qujattardan tolyq bas tartý kózdelip otyr.
