Qazaqstannyń tórt oblysy ákiminiń orynbasarlary sógis aldy
BALQASh. KAZINFORM — Balqash qalasy Premer-Mınıstrdiń orynbasary Ermek Kósherbaevtyń jetekshiligimen qurylǵan vedomstvoaralyq jumys toby júrgizgen respýblıkalyq ınspektsııa barysynda synǵa ilikti.
Tekserý aıasynda Almaty, Qaraǵandy, Jetisý jáne Abaı oblystarynyń kýrorttyq aımaqtary qamtylyp, týrızm salasyndaǵy kúrdeli júıeli problemalar anyqtaldy.
Inspektsııa qorytyndysy boıynsha Balqash qalasynyń ákimi tártiptik jazaǵa tartylyp, oǵan resmı túrde sógis jarııalandy. Mundaı sheshim týrıstik ınfraqurylymnyń qanaǵattanǵysyz jaǵdaıy men jaǵajaılarda sanıtarlyq talaptardyń óreskel buzylýyna baılanysty qabyldanǵan.
Premer-Mınıstrdiń baspasóz qyzmetiniń málimetinshe, kommýnaldyq jaǵajaılardaǵy ahýal erekshe alańdaýshylyq týǵyzǵan. Tekserý barysynda abattandyrý talaptarynyń saqtalmaýy, kásipkerler tarapynan kassalyq tártiptiń buzylýy, chekterdiń berilmeýi, sanıtarlyq-gıgıenalyq jáne qaýipsizdik normalarynyń oryndalmaýy syndy zańbuzýshylyqtar tirkelgen.
10–12 shilde kúnderi jumys toby Balqashqa baryp, jaǵdaıdy kózben kórip qaıtty. Delegatsııa músheleri týrıstermen kezdesip, demalys oryndaryn aralap, kórsetiletin qyzmetterdiń sapasymen tanysty. Qalaǵa kelgen qonaqtar ınfraqurylymnyń nasharlyǵy, qolaılylyqtyń joqtyǵy, jaǵajaılardyń tazalanbaýy jáne qaýipsizdik sharalarynyń saqtalmaýyna qatysty shaǵym aıtty.
Tekserý qorytyndysynda týrızm salasyna jetekshilik etetin Qaraǵandy oblysy ákiminiń orynbasaryna qatań sógis jarııalandy. Sondaı-aq Balqashtyń birqatar aýyldyq okrýg ákimderiniń atyna da tártiptik jaza qoldanyldy. Budan bólek, oblystyq týrızm, kásipkerlik, ekologııa, sáýlet jáne saýda basqarmalarynyń basshylary jaýapkershilikke tartyldy. Sonymen qatar, ekologııa, densaýlyq saqtaý, qarjy, sý resýrstary, kólik jáne saýda mınıstrlikteriniń aýmaqtyq bólimsheleriniń jetekshilerine de tıisti sharalar qabyldandy.
Qazirgi ýaqytta óńirde ortalyq memlekettik organdardyń qatysýymen qosymsha tekserýler bastaldy. Olardyń nátıjesinde týrızm ınfraqurylymyn jaqsartýǵa baǵyttalǵan Jol kartasy ázirlenetin bolady. Qujatta júıeli máselelerdi joıýǵa arnalǵan shuǵyl is-sharalar qamtylady.
Sonymen birge, jumys tobynyń negizinde turaqty túrde jumys isteıtin jobalyq keńse quryldy. Onyń mindeti — kýrorttyq aımaqtardaǵy abattandyrý jumystaryn, týrıstik qyzmet sapasyn arttyrýdy jáne qoǵamdyq tártipti qamtamasyz etýdi úılestirý.
Eske salaıyq, bıylǵy jazda Balqash qalasyna týrıster kóptep kelgenimen, kórsetiletin qyzmet sapasy men ınfraqurylym deńgeıi qoǵamda keń talqylanǵan bolatyn. Jergilikti turǵyndar men belsendiler bul máseleni buǵan deıin birneshe ret kóterip, endi ol Úkimet deńgeıinde resmı jaýapqa ıe boldy.o
Osyǵan deıin 2025 jyldyń birinshi jartysynda Balqash kóliniń deńgeıi orta eseppen 32 sm-ge kóterilgeni málim boldy.