Qazaqstannyń tórt banki uıymdasqan qylmystyq top isine qatysty birlesken málimdeme jasady

ASTANA. KAZINFORM – Kaspi Bank, Forte Bank, Eýrazııalyq bank jáne Jusan bank (qazirgi ataýy – Alatau City Bank) prokýratýra organdarynan resmı habarlama almaǵanyn málimdedi. Bul týraly Qazaqstan qarjygerler qaýymdastyǵy taratqan habarlamada aıtylǵan.

«Qazirgi ýaqytta bankterge burynǵy nemese qazirgi qyzmetkerleriniń osy qylmystyq iske qatysy bar ekendigi jóninde faktiler belgisiz. Sondyqtan biz prokýratýraǵa resmı túrde aqparat alý úshin júginemiz», – delingen birlesken málimdemede.

Sonymen qatar qarjy ınstıtýttary resmı qujattar arqyly rastalǵan aqparat túsken jaǵdaıda quqyq qorǵaý organdaryna tergeý barysynda qoldaý kórsetýge daıyn ekendikterin jetkizdi.

2 qyrkúıekte Aqmola oblysynyń prokýratýrasy Kaspi Bank, Forte Bank, Eýrazııalyq bank jáne Jusan bank qyzmetkerleri ustalǵan bolýy múmkin degen aqparat taratqan edi.

Prokýratýranyń baspasóz qyzmeti uıymdasqan qylmystyq top áleýmettik osal toptaǵy azamattardy urlap, olardyń atyna iri kólemde nesıe rásimdegenin habarlaǵan bolatyn.