Qazaqstannyń «TMD +» formatyn qurý bastamasy Dostastyqtyń bedelin arttyrady
MINSK. KAZINFORM — TMD shtab-páterinde sarapshylardyń qatysýymen «TMD +» formatyn qurý múmkindikteri talqylandy, dep habarlaıdy Kazinform agenttiginiń tilshisi.
Otyrysqa uıymǵa múshe memleketter men TMD Atqarýshy komıtetiniń ókilderi qatysty.
Basqosýda alǵash bolyp sóz alǵan TMD Bas hatshysynyń orynbasary Nurlan Seıtimov talqylanyp otyrǵan bastamany Qazaqstan Prezıdenti Qasym-Jomart Toqaev byltyr qazanda ótken sammıtte usynǵanyn atap ótti.
— TMD-ǵa qatysýshy memleketter Dostastyqtyń álemdik arenadaǵy ımıdjin odan ári ilgeriletýge múddeli. Bul rette Birikken Ulttar Uıymy jáne ózge de aımaqtyq birlestiktermen baılanysty nyǵaıtý mańyzdy. Sondyqtan Tájikstannyń Dostastyqqa tóraǵalyq etý kezeńinde osy jumystarǵa basymdyq beriledi, — dedi Nurlan Seıtimov.
Onyń aıtýynsha, uıymnyń qyzmetin ózge ıntegratsııalyq formattarmen ushtastyrý TMD-nyń bedelin arttyrýǵa sózsiz yqpal etedi.
Qatysýshylar atap ótkendeı, sarapshylar Qazaqstan bastamasyn talqylaýdy jalǵastyrady. Bul usynysty zerdeleý úshin kelesi otyrys 18 naýryzda ótedi.
Eske sala keteıik, bıyl 28 sáýirde Ózbekstan astanasynda TMD Ekonomıkalyq keńesiniń otyrysy ótedi.