Qazaqstannyń tájirıbesi ShYU qyzmetine serpilis berdi – ózbekstandyq sarapshy

TAShKENT. KAZINFORM – Qazaqstan Shanhaı yntymaqtastyq uıymynyń (ShYU) beldi múshesi retinde onyń damýy men qyzmet baǵytyn aıqyndaýǵa zor úles qosty. Ózbekstandyq sarapshy, ÓR Ǵylym Akademııasynyń Memleket jáne quqyq ınstıtýtynyń aǵa ǵylymı qyzmetkeri Ravshan Nazarov elimizdiń ShYU-ǵa tóraǵalyq etýine qatysty osyndaı pikir bildirdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Sarapshy atap ótkendeı, Qazaqstannyń halyqaralyq uıymdarǵa tóraǵalyq etýde tájirıbesi mol. Atap aıtqanda, elimiz buǵan deıin Táýelsiz memleketter dostastyǵy, Eýrazııalyq ekonomıkalyq odaq, Ujymdyq qaýipsizdik týraly shart uıymy sııaqty qurylymdarǵa jetekshilik etti.

«Qazaqstan ShYU-nyń beldi múshesi retinde onyń damýyna jáne qyzmet baǵytyn naqtylaýǵa zor úles qosty. Bul oraıda atap ótetin erekshelik bar: ShYU memleketteri basshylarynyń ishinde tek Qasym-Jomart Toqaev qana kásibı dıplomat sanalady. Sondyqtan osy baǵyttaǵy Qazaqstannyń tájirıbesi tóraǵalyq etý kezinde aıryqsha sezildi, uıymnyń qyzmetine serpilis berdi», - dep baǵa berdi sarapshy.

Ravshan Nazarovtyń sózinshe, óńir elderiniń ShYU-ǵa qyzyǵýshylyǵy jyl saıyn artyp keledi. Bul rette, ol osydan 2 jyl buryn uıymǵa Iran Islam Respýblıkasynyń múshe bolǵanyn erekshe atap ótti.

«Irannyń ShYU-ǵa tolyq múshe bolýy uıymnyń salmaǵyn arttyryp, bedelin kóterýge yqpal etti. Sonymen qatar, qazirgi ýaqytta Belarýs te bul qurylymnyń qataryn tolyqtyrýǵa nıetti ekenin málimdep jatyr. Alǵashynda «Shanhaı bestigi» bolyp qurylǵan uıym shekara máselelerin sheshýmen aınalysty. Keıin oǵan Ózbekstan qosylyp, ShYU aýqymdy qurylymǵa aınala bastady», - dedi R. Nazarov.

Bastapqyda ShYU-nyń qyzmeti aımaqtyq qaýipsizdik máselelerin sheshýge baǵyttalsa, qazirgi kúni ol áleýmettik-ekonomıkalyq yntymaqtastyqqa oıysyp keledi. Sarapshy uıymǵa múshe elderdiń áleýeti mol ekenin eskere otyryp, sol múmkindikti birlese damýǵa negizdeý mańyzdy ekenine toqtaldy.

«Jer sharynyń jarty halqy ShYU-ǵa múshe elderdiń úlesinde. Bul uıymnyń perspektıvaly ekenin bildiredi. Sondyqtan Astanada ótetin sammıtte qabyldanatyn mańyzdy qujattar osy múmkindikterdi eskeredi dep senemiz. Bul rette, memleket basshylary ShYU aıasyndaǵy aldaǵy yntymaqtastyqtyń baǵdary retinde áleýmettik-ekonomıkalyq jáne mádenı-gýmanıtarlyq salalarǵa basymdyq berýi yqtımal», - dep túıindedi Ravshan Nazarov.

Eske salaıyq, 3-4 shildede Astanada Shanhaı yntymaqtastyq uıymynyń sammıti ótedi. Onyń qorytyndysy boıynsha birneshe mańyzdy qujatty qabyldaý josparlanyp otyr.

Qosa ketsek, sammıt ótetin aralyqta elordanyń áýe keńistigi kúsheıtilgen rejımde kúzetiledi. Sondaı-aq, Astana qalasynyń tóńiregine blok-posttar qoıylyp, dinı nysandar baqylaýǵa alyndy.