Qazaqstannyń taýarlar eksporty kólemi jarty jylda 30,4 mlrd dollarǵa jetti
ASTANA.KAZINFORM – Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın bıylǵy alǵashqy jarty jyldaǵy syrtqy saýda aınalymy jáne óndiris kólemi jóninde málimdeme jasady.
– Bıyl qańtar-mamyrda syrtqy saýda aınalymy 56,3 mlrd dollar boldy. Taýarlar eksporty 30,4 mlrd dollarǵa jetti, onyń ishinde óńdelgen taýarlardyń eksporty – 11,8 mlrd dollar. Taýarlar ımporty 26 mlrd dollar boldy. 4,4 mlrd dollardan astam kólemde oń saýda balansy saqtalyp otyr, – dedi ol.
Sonymen qatar, óńdeý ónerkásibi ósimniń negizgi draıverleriniń biri bolyp otyr.
– Óndiris kóleminiń ósýi 9,8% boldy. Bul bıylǵy qańtar-mamyrdaǵy kórsetkishten 0,8 paıyzdyq tarmaqqa joǵary 17 óńirde ósý tirkeldi. Ekonomıkalyq ósýdiń belsendi saıasaty jalǵasyp jatyr, – dedi Serik Jumanǵarın.
Sonymen birge, onyń sózinshe, basymdyq beriletin salalardy qarjylandyrý úshin bıýdjetten «Báıterek» holdıngine kózdelgen 1 trln teńgeniń búgingi tańda 398 mlrd teńgesi bólindi. Holdıng jalpy somasy 5,1 trln teńgege jobalardy qarjylandyrdy.
– Qosymsha, Ulttyq ekonomıka mınıstrligi barlyq negizgi shıkizat segmentteri boıynsha 10 keńeıtilgen salalyq taldaý daıyndady.
Olardyń negizinde metallýrgııa, munaı-gaz hımııasy, kómir hımııasy jáne agroónerkásiptik keshendegi 231 perspektıvalyq jobanyń pýly qalyptastyryldy. Áleýetti strategııalyq seriktester retinde qarastyrylatyn 200 jetekshi sheteldik kompanııanyń tizimi jasaldy. Osy jyldyń naýryzynan beri júrgizilip jatqan jumystardyń qorytyndysy boıynsha 40 halyqaralyq kompanııa qyzyǵýshylyq tanytty. Aldaǵy aılarda árbir segmenttegi áleýetti strategııalyq seriktestermen naqty kelissózder bastalady, – dedi Serik Jumanǵarın.
Aıta keteıik, buǵan deıin Qazaqstannyń syrtqy saýda aınalymy 7,9%-ǵa ulǵaıǵanyn jazǵanbyz.
