Qazaqstannyń taý-ken salasynda 6 mıllıard dollarǵa ınvestıtsııalyq jobalar iske qosylady
ASTANA. KAZINFORM – Qazaqstanda jaqyn aralyqta taý-ken salasynda 5 iri joba júzege asyrylady, olardyń jalpy quny 6 mıllıard dollardan asady. Bul týraly Qazaqstannyń Ónerkásip jáne qurylys mınıstri Ersaıyn Naǵaspaev KGIR-2025 jahandyq ınvestıtsııalar boıynsha dóńgelek ústelinde aıtty.
Mınıstrdiń aıtýynsha, taý-ken jáne metallýrgııalyq salalar Qazaqstan ekonomıkasynyń negizgi tirekteriniń biri bolyp qala beredi.
– Bizdiń elimiz volfram, ýran jáne hromıt keni boıynsha álemdik kóshbasshylar qatarynda, sondaı-aq marganets, kúmis, myrysh jáne basqa da baǵaly paıdaly qazbalar qory boıynsha da jetekshi oryndarda. Bul resýrstar jahandyq energetıkalyq ózgerister aıasynda joǵary suranysqa ıe, – dedi E.Naǵaspaev.
2024 jyly taý-ken, metallýrgııa salalarynyń úlesi eldiń JІÓ-niń 8%-yna teń boldy, al jalpy óndiris kólemi 29 mlrd dollardan asty, onyń 21 mlrd dollar bolatyn bóligi eksportqa shyǵarylǵan.
– Bul salaǵa ınvestıtsııalar 3,6 mlrd dollarǵa jetti, al jaqyn arada bes iri ınvestıtsııalyq jobany júzege asyrý josparlanyp otyr. Olardyń jalpy quny 6 mlrd dollardan asady, bul shamamen 8 myń jańa jumys ornyn qurýǵa septigin tıgizedi, – dedi mınıstr.
Onyń aıtýynsha, Qazaqstan qara metall, tústi metall jáne sırek jer metaldarynyń negizgi jetkizýshileriniń biri bolyp otyr. Elimiz eksporttyq ónimderdi de, ótkizetin naryqtardy da ártaraptandyrý boıynsha belsendi jumys júrgizip jatyr.
– Halyqaralyq jetekshi kompanııalarymen qol qoıylǵan memorandýmdar men kelisimder bizdiń osy baǵytqa berik ekenimizdi aıqyn kórsetedi. Sheteldik ınvestorlardyń qatysýymen birneshe iri jobalar júzege asyrylyp keledi, olar mańyzdy mıneraldardy óndirý men óńdeýge arnalǵan. Barlyq osy sharalar uzaq merzimdi jáne ózara tıimdi yntymaqtastyq úshin berik negiz qalyptastyrady. Sol sebepti biz geologııalyq barlaý jáne taý-ken kompanııalaryn Qazaqstandaǵy jańa jobalardy damytýǵa shaqyramyz, – dedi mınıstr.
Aıta keteıik, Qazaqstan Shyǵys pen Batys arasyndaǵy geosaıası jáne geoekonomıkalyq kópir bolyp, kólik pen energetıka salasyndaǵy jańa dálizderdiń negizgi torabyna aınaldy.
Buǵan deıin «Astana» halyqaralyq qarjy ortalyǵynyń basqarýshysy Renat Bekturov elimizdiń taý-ken salasyna qandaı ınvestorlar kelip jatqanyn aıtty.