Qazaqstannyń taý-ken salasyna qandaı ınvestorlar kelip jatyr
ASTANA. KAZINFORM – «Astana» halyqaralyq qarjy ortalyǵynyń basqarýshysy Renat Bekturov KGIR-2025 jahandyq ınvestıtsııalar dóńgelek ústelinde elimizdiń taý-ken salasyna qandaı ınvestorlar kelip jatqanyn aıtty.
Onyń aıtýynsha, 2018 jyly «Jer qoınaýy týraly» kodekske engizilgen ózgerister ınvestorlar úshin zańnamany jeńildetti.
– Byltyrdan beri kanadalyq Teck Resources, Quantum First, B2Gold sııaqty jańa kompanııalar Qazaqstan naryǵyna qyzyǵýshylyq tanytyp otyr. Al jaqynda gonkongtyq Jiaxin Mining kompanııasy IPO-ǵa shyǵyp, 150 mıllıon dollardan astam qarjy tartty. Onyń bárin Qazaqstandaǵy volfram óndirisine salady. Bul birinshi keıs, aldaǵy ýaqytta mundaı keısterdiń sany artady dep senemin, - dedi R. Bekturov tilshilerge bergen suhbatynda.
Onyń aıtýynsha, qazir amerıkalyq ınvestorlarmen de kelissózder júrgizilip jatyr.
– Qazaqstanda jańa ken oryndary jeterlik. Sol jobalarǵa kapıtal tartý kerek, ıaǵnı táýekel alatyn ınvestorlardy tartý kerek. Jańa Zijin Mining Group kompanııasynyń Gonkongtaǵy ókilderimen kezdestim. Olar jýyrda RG Gold kompanııasyn satyp aldy. Qazir Zijin Mining shamamen 30 mıllıard dollarǵa baǵalandy. Bul da elimizdiń taý-ken salasyna jańa ınvestorlardyń kelýine múmkindik ashady, - dedi AÓHO basshysy.
Aıta keteıik, Qazaqstanǵa tartylǵan tikeleı sheteldik ınvestıtsııa kólemi 10,1 mlrd dollardy qurady.
Sondaı-aq Qazaqstan aýmaǵynan 8 halyqaralyq kólik dálizi ótetinin jazǵanbyz.