Qazaqstannyń ІT-naryǵy eń jyldam ósip jatqan 10 ekojúıeniń qataryna qosyldy
ASTANA. KAZINFORM — Qazaqstan resmı túrde Rising Stars sanatyndaǵy úzdik 10 eldiń qataryna endi. Bul nátıje Qazaqstannyń ósip kele jatqan ınvestıtsııalyq tartymdylyǵyn jáne onyń óńirdegi tehnologııalyq hab retindegi pozıtsııasyn kórsetedi. Kóshbasshylar ondyǵyna kirý ІT-kásipkerlikti damytý boıynsha júıeli jumystar arqasynda múmkin boldy. Bul týraly vedomstvonyń baspasóz qyzmeti málim etti.
Búgingi tańda elimizde jasandy ıntellekt pen perspektıvaly ázirlemelerge basa nazar aýdara otyryp, tehnologııalyq kompanııalardy ósýdiń barlyq kezeńinde qoldaýdyń ekojúıesi qurylǵan. Bul jumystyń praktıkalyq tıimdiligi naqty tsıfrlarmen kórinis tapty: sońǵy bes jylda Astana Hub rezıdentteriniń jalpy tabysy 4,9 mıllıard dollardy qurady, al tartylǵan ınvestıtsııa kólemi 910 mıllıon dollardan asty. Akseleratsııa jáne ınkýbatsııa baǵdarlamalary qazaqstandyq startaptarǵa aýqymyn keńeıtýge, seriktester tabýǵa jáne syrtqy naryqtarǵa shyǵýǵa múmkindik beredi.
— Otandyq ekojúıeniń mundaı joǵary deńgeıde tanylýy Qazaqstannyń tehnologııalyq sektory jahandyq arenada tolyqqandy oıynshyǵa aınalyp jatqanyn dáleldeıdi. Elimiz tek sandyq ósimdi kórsetip qana qoımaı, tehnologııalyq jobalardy aýqymdandyrý úshin sapaly jaǵdaılar jasaýda, bul bizdiń naryqty iri halyqaralyq ınvestorlar úshin túsinikti ári tartymdy etedi, — dep atap ótti Premer-Mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev.
Mundaı kórsetkishterge qol jetkizý jáne halyqaralyq deńgeıde tanylý Qazaqstannyń ІT-naryǵynyń jahandyq ınvestorlar qaýymdastyǵyna ıntegratsııalanýǵa daıyn ekenin aıǵaqtaıdy. Bul baǵalaý Dealroom.co analıtıkalyq platformasynyń The Global Tech Ecosystem Index 2026 reıtınginde usynylǵanyn eske sala ketken jón. Kásibı ortada onyń derekteri Crunchbase jáne PitchBook sııaqty resýrstarmen qatar ındýstrııalyq standart bolyp sanalady.
Aıta keteıik, Dealroom ındeksi 77 eldegi 325 qalany qamtıdy jáne sýbektıvti baǵalaýlardy qospaǵanda, naqty matematıkalyq metrıkalarǵa (venchýrlyq kapıtal kólemi, kompanııalardyń quny, patentter) negizdeledi. Bul rette, Rising Stars sanatynda platforma ınnovatsııalardyń ósýin jan basyna shaqqandaǵy jergilikti JІÓ-ni jáne ómir súrý qunyn eskere otyryp, túzetetin arnaıy ádistemeni qoldanady jáne damyp kele jatqan naryqtardyń dınamıkasyn obektıvti baǵalaýdy qamtamasyz etedi. Búgingi tańda 100-den astam eldiń tsıfrlandyrý mınıstrlikteri men úkimettik uıymdary, sondaı-aq iri venchýrlyq qorlar men tehnologııalyq korporatsııalar Dealroom API jáne analıtıkalyq dashbordtaryna senim bildiredi.
Aıta keteıik, buǵan deıin jasandy ıntellekt qazaqsha jańalyqtardy ym tiline aýdarǵanyn jazdyq.
