Qazaqstannyń suraýymen Grýzııada halyqaralyq izdeýde júrgen bes adamdy ustady
ASTANA. KAZINFORM – Qazaqstan men Grýzııa Іshki ister mınıstrlikteri arasyndaǵy ózara is-qımyl jańa deńgeıge kóterildi, dep habarlaıdy Polisia.kz.
2026 jylǵy aqpanda Qazaqstanǵa resmı saparmen Grýzııa Іshki ister mınıstrliginiń delegatsııasy keldi. Sapar aıasynda QR Іshki ister mınıstri Erjan Sadenov grýzııalyq áriptesi Gela Geladzemen kezdesti.
Kelissózder barysynda taraptar yntymaqtastyqtyń ózekti máselelerin talqylap, qylmyspen kúrestegi úılestirý jumystary men tájirıbe almasýǵa erekshe nazar aýdardy. Sapar eki eldiń polıtsııa vedomstvolary arasyndaǵy áriptestikti odan ári nyǵaıtýǵa baǵyttaldy.
Yntymaqtastyq nátıjesinde Grýzııa tarapy Qazaqstannyń suraýy boıynsha halyqaralyq izdeýde júrgen bes adamdy ustady. Olardyń tórteýi alaıaqtyq qylmystary úshin, bireýi esirtki quraldarynyń zańsyz aınalymy boıynsha izdeýde bolǵan.
Sonymen qatar Batýmı qalasynda 37 jastaǵy Qazaqstan azamaty qolǵa tústi. Ol 2014-2020 jyldar aralyǵynda Almaty qalasynda uıymdasqan top quramynda kommertsııalyq uıym atyn jamylyp, qarjy pıramıdasyn qurǵan.
Tergeý derekterine sáıkes, azamattardan ınvestıtsııa retinde qarajat tartylǵanymen, naqty tabys bolmaǵan. Tólemder jańa salymshylardyń esebinen júrgizilgen.
Zańsyz áreketter saldarynan 1451 azamat zardap shegip, keltirilgen jalpy shyǵyn kólemi 10,4 mlrd teńgeden asqan.
– Bul baǵyttaǵy jumys jalǵasatyn bolady, – dep málimdedi polıtsııa ókilderi.
Aıta keteıik, alaıaqtyq jasaǵan Qazaqstan azamaty Reseıden ekstradıtsııalandy.
