Qazaqstannyń sý júıesin jańartý jobasyna 5,3 mln dollar baǵyttaldy
ASTANA. KAZINFORM — Qazaqstannyń ırrıgatsııa salasyn jańǵyrtýǵa Eýrazııalyq damý banki 5,3 mln dollar kóleminde grant bóledi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Sý resýrstary jáne ırrıgatsııa mınıstrligi, Qazaqstandaǵy BUU Damý baǵdarlamasy (BUUDB) jáne Eýrazııalyq damý banki (EADB) «Qazaqstandaǵy turaqty ırrıgatsııa úshin bıznes ekojúıeni damytý» jobasy boıynsha úshjaqty kelisimge qol qoıdy. Jobany iske asyrýǵa EADB 5,3 mln dollar kóleminde grant bóledi.
Qarjylyq kelisimge Sý resýrstary jáne ırrıgatsııa mınıstri Nurjan Nurjigitov, Qazaqstandaǵy BUUDB Turaqty ókili Katarjına Vavernıa jáne EADB basqarma tóraǵasynyń orynbasary Rýslan Dalenov qol qoıdy. Bul joba birneshe jylǵa josparlanǵan. Onyń aıasynda Ulttyq sý resýrstary aqparattyq júıesin qurý, sý boljamy jáne tıimdi bólý quraldaryn engizý, zamanaýı ırrıgatsııanyń óńirlik ortalyqtaryn qalyptastyrý, mamandardyń biliktiligin arttyrý, sondaı-aq sý únemdeý tehnologııalaryn engizý kózdelgen.
— Bul bastama Qazaqstannyń ırrıgatsııa júıesin damytýǵa jáne sýdy tıimdi paıdalanýdy arttyrýǵa baǵyttalǵan. Bizdiń bul jobaǵa qatysýymyz sý sharýashylyǵyn jańǵyrtý jáne klımattyq ózgeristerge beıimdelý jónindegi strategııalyq maqsattarymyzdy júzege asyrýǵa múmkindik beredi. Memleket basshysynyń tapsyrmasyna sáıkes biz elimizdiń sý salasyna ınvestıtsııa tartý boıynsha belsendi jumys júrgizip kelemiz. Alaıda barlyq strategııalyq sheshim tek Qazaqstanda qabyldanady jáne solaı qala beredi de. Sondaı-aq sý resýrstary men nysandaryn shet memleketterdiń qoldanysyna berý máselesi eshqashan qaralǵan emes. Basty maqsatymyz — azamattarymyzdyń múddesin qorǵaý, elimizdiń qaýipsizdigi men turaqty damýyn qamtamasyz etý úshin sý sektoryn jańǵyrtý, — dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin bıyl ırrıgatsııa júıelerindegi sý shyǵyny 250 mln tekshe metrge deıin azaıǵany anyqtaldy.