Qazaqstannyń sý salasynyń dıplomattary Eýropa men Qytaıda bilim alyp jatyr
ASTANA. KAZINFORM - Memleket basshysynyń tapsyrmasyn oryndaý maqsatynda Sý resýrstary jáne ırrıgatsııa mınıstrligi sheteldik seriktestermen birlesip sý dıplomatııasy salasyndaǵy mamandardy daıarlaý jumystaryn júrgizip jatyr, dep habarlaıdy mınıstrliktiń baspasóz qyzmeti.
Byltyr qarasha aıynda qos dıplomdy magıstratýra baǵdarlamasy sheńberinde Qazaq ulttyq sý sharýashylyǵy jáne ırrıgatsııa ýnıversıtetiniń 13 magıstranty Korvınýs ýnıversıteti bazasynda bilim aldy.
2025 jyldyń jeltoqsanynda qazaqstandyq sý salasynyń mamandar toby Beıjiń qalasyndaǵy Qytaı halyq ýnıversıtetinde dıplomatııalyq quzyretterdi damytýǵa arnalǵan kýrstardan ótti.
Sonymen qatar Delft sý bilim berý ınstıtýtymen (IHE Delft) birlesip júzege asyrylyp jatqan Young Water Diplomats (Jas sý dıplomattary) baǵdarlamasy aıasynda qazaqstandyq mamandar Nıderlandta bilim alyp jatyr.
-Sońǵy ýaqytta sý dıplomatııasynyń mańyzy artyp keledi. Osy baǵyttaǵy kadrlyq áleýetti kúsheıtý úshin jańa bilim berý baǵdarlamalary men bastamalar ázirlenip, engizilip jatyr. Búginde mamandar Ál-Farabı atyndaǵy Qazaq ulttyq ýnıversıtetinde, Q.I. Sátbaev atyndaǵy Qazaq ulttyq tehnıkalyq zertteý ýnıversıteti men Qazaq ulttyq sý sharýashylyǵy jáne ırrıgatsııa ýnıversıtetinde daıarlanady. Qazaqstan-Nemis ýnıversıteti «Sý resýrstaryn ıntegratsııalanǵan basqarý» baǵdarlamasyn iske asyrýda. Al D. Amanjolov atyndaǵy Shyǵys Qazaqstan ýnıversıtetinde sý dıplomatııasyna qatysty pánder oqytylady, - dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin Qazaqstannyń sý resýrstary 15 jyldyq strategııaǵa saı keshendi josparlaýǵa kóshetini týraly jazdyq.