Qazaqstannyń sý qoımalary sý tasqynyna daıyndalyp jatyr
ASTANA. KAZINFORM – Sý resýrstary jáne ırrıgatsııa mınıstrligi sý tasqyny kezeńine daıyndyq júrgizip jatyr. Bul týraly Úkimettiń baspasóz qyzmeti habarlady.
Búginde sý qoımalarynda qajetti syıymdylyq kólemin daıyndaý júrgizilip jatyr. Vedomstvonyń málimeti boıynsha, Astana sý qoımasyndaǵy sý kólemi 83%-ǵa deıin tómendetildi: 2024 jyldyń 20 jeltoqsanynan 2025 jyldyń 3 qańtaryna deıin shamamen 5,1 mln m3 sý jiberildi. Mınıstrlik 2025 jyldyń 1 sáýirine deıin qoımadaǵy sý kólemin 300 mln m3 nemese 73%-ǵa deıin azaıtýdy josparlap otyr.
Aqtóbe sý qoımasynda shamamen 51 mln m3 sý bar. 1 sáýirge deıin sý kólemin 47,3 mln m3 deńgeıine azaıtý josparlanyp otyr. Al Batys Qazaqstan oblysy Bitik qoımasyndaǵy sý kólemi 34,4 mln m3 deıin tómendetildi. Búgingi tańda sý qoımasynan sekýndyna 8,3 m3 sý jiberilip jatyr.
Shyǵys Qazaqstan oblysyndaǵy Buqtyrma sý qoımasy 79%-ǵa toly. Mınıstrlik 1 sáýirge deıin qoımadaǵy sý kólemin taǵy 8%-ǵa azaıtýǵa nıetti. Qaraǵandy oblysyndaǵy Yntymaq sý qoımasynda 69 mln m3 sý bar. Kóktemde tasqyn sý qabyldaý úshin sý qoımasyn 39%-ǵa deıin bosatý josparlanyp otyr.
Ulytaý oblysyndaǵy Keńgir sý qoımasyndaǵy sý kólemi 86%-ǵa tómendetildi. Kóktemge deıin taǵy 11%-ǵa jýyq sý jiberý josparlanǵan. Qostanaı oblysyndaǵy Joǵarǵy Tobyl sý qoımasynda 585,4 mln m3 sý bar. Sý qoımasynyń jumys rejımine sáıkes, 1 sáýirge deıin sý kólemin 499,37 mln m3 nemese 61%-ǵa deıin azaıtý josparlanǵan.
– Kóktemde tasqyn sýdy rezervýarlarda jınap qana qoımaı, kólder júıesine, tabıǵı jaıylymdar men shabyndyqtarǵa baǵyttaý óte mańyzdy. Sol sebepti sýdy tıimdi bólý jumysyn aldyn ala josparlaý qajet. Bıyl sharýalar men basqa da sý paıdalanýshylardyń suranysy tolyq qanaǵattandyryldy. Ótken sýarý kezeńinde elimizdiń sharýa qojalyqtaryna shamamen 11 mlrd m3 sý berildi. Budan bólek úlken jáne shaǵyn sý aıdyndaryn saqtaý jáne qalpyna keltirý boıynsha úlken jumys atqaryldy, - dep atap ótti Sý resýrstary jáne ırrıgatsııa mınıstri Nurjan Nurjigitov.
Islam damý banki qarjysyna elimizde 9 jańa sý qoımasy salynatynyn jazǵan bolatynbyz.