Qazaqstannyń Sý kodeksi qaı eldiń tájirıbesi boıynsha jazylyp jatyr – mınıstr jaýaby
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Qazaqstannyń Sý kodeksi qaı eldiń tájirıbesi boıynsha qaıta jazylyp jatqanyn aıtty.
«Bizdiń mınıstrlik álemdegi ozyq tájirıbelerge, atap aıtqanda Germanııanyń tájirıbesine nazar aýdara otyryp, Sý kodeksin ózektendirdi. Parlament Májilisine engizilgen qujattyń jańa redaktsııasynda sýdy sarqylýdan, lastanýdan jáne bitelýden qorǵaýǵa basymdyq berildi. Resýrstyń ózi endi tek ekonomıkalyq paıda kózi retinde qarastyrylmaıdy. Sonymen qatar jańa Sý kodeksiniń normalary júıelengen jáne deklaratıvti, qaıtalanatyn normalar alynyp tastaldy. Jańa Sý kodeksiniń qaǵıdattary men mindetteri olardy iske asyrý tetikterimen nyǵaıtylǵan. Sonymen qatar gıdrotehnıkalyq nysandardyń qaýipsizdigi, ırrıgatsııa jáne drenaj, aýyz sý jáne sýmen jabdyqtaý máseleleri jeke tıisti bólimderge bólingen. Jańa Kodekste sýdy únemdeý óte mańyzdy ról atqarady. Mysaly, sý paıdalanýshylar sý resýrstaryn utymdy paıdalanýǵa, sýdy únemdeý tehnologııalary men sýdy qaıta paıdalaný júıelerin engizý jóninde is-sharalar qabyldaýǵa, sondaı-aq jerasty aýyzsýyn maqsatsyz paıdalanýǵa jol bermeýge mindetti», - dedi mınıstr Nazarabev ýnıversıtetinde ótip jatqan halyqaralyq forýmda.
Sondaı-aq, ol sý salasyndaǵy zańsyzdyqtarǵa jol bergenderdiń jaýapkershiligi zańnama deńgeıinde kúsheıtiletini málim etti.
«Aýyzsýdyń sapasyn jaqsartýǵa qoıylatyn talaptar paıda boldy. Eldi mekenderdi sýmen jabdyqtaýǵa jáne sý burýǵa arnalǵan taraý edáýir keńeıdi. Jeke taraý elimizdiń sý salasyn klımattyń ózgerýine beıimdeýge arnalǵan. Sý resýrstaryn qorǵaý jáne paıdalaný salasyndaǵy qoǵamdyq baqylaýǵa kóp kóńil bólinedi. Gıdrotehnıkalyq qurylystardyń qaýipsizdigi máselesine jeke bólim arnalyp otyr. Kásiporyndardyń olardy paıdalaný jáne osynyń negizinde qaýipsizdik deklaratsııasy resimdeletin kóp faktorly tekserý júrgizý jaýapkershiligi aıqyndaldy. Jyl saıyn Ulttyq aqparattyq esep jarııalanady, onda ótken kúntizbelik jyldaǵy eldegi sýdyń jaı-kúıi, qorǵalýy jáne paıdalanylýy týraly málimet bolady. Jańa Sý kodeksiniń jekelegen erejeleri eldiń sý salasyna ınvestıtsııa tartýdy yntalandyrýdy jáne sý resýrstaryn qorǵaý jáne paıdalaný salasyndaǵy ǵylymı-zertteý jáne ǵylymı-tehnıkalyq jumystardy memlekettik qoldaýdy kózdeıdi», - dedi Nurjan Nurjigitov.
