Qazaqstannyń sý-energetıkalyq resýrstar kartasy ázirlenip jatyr

ASTANA. KAZINFORM – Elimizdiń gıdroenergetıkalyq resýrstary kartasyn ázirleý boıynsha jumystar bastaldy. Bul týraly Energetıka mınıstri Erlan Aqkenjenov Úkimet otyrysynda málim etti.

– Platforma gıdrologııalyq, jer bederi, ınfraqurylymdyq jáne quqyqtyq derekterdi biriktirip, ońtaıly jobalyq sheshimderdi qalyptastyrýǵa, bolashaq stantsııalardyń parametrlerin esepteýge jáne jobalaýǵa deıingi daıyndyq merzimderin qysqartýǵa múmkindik beredi, – dedi Energetıka mınıstri.

Óz kezeginde Sý resýrstary mınıstri Nurjan Nurjigitov memlekettik sý sharýashylyǵy saıasatynyń uzaq merzimdi josparlaý qujattaryn ázirlep jatqanyn jetkizdi. Bul qujattarda sý balansy jańartylyp, eldiń gıdroáleýetine baǵa beriledi.

– Birinshi kezeńde sý resýrstaryn qorǵaý jáne paıdalaný jónindegi basseındik josparlar ázirlenedi, olardy 2026 jyldyń sońyna deıin aıaqtaý josparlanǵan. Basseındik josparlar ázirlengen soń, sý resýrstaryn ıntegratsııalanǵan basqarýdyń Bas josparyn ázirleý bastalady. Ony 2027 jyldyń 3-shi toqsanynda aıaqtaýdy josparlap otyrmyz, – dedi Sý resýrstary mınıstri.

Boljamdy sý balansy bekitilgenshe mınıstrlik Energetıka mınıstrligi jáne jeke ınvestorlarmen birlesip, GES jáne GAES qurylysy boıynsha jumystar júrgizip jatyr.

– Bıyl Ógem ózeninde gıdroelektrstantsııalar kaskady bar sý qubyryn salý jónindegi ınvestıtsııalyq joba boıynsha jobalyq qujattama ázirleýdi bastady, ol memlekettik-jeke áriptestik negizinde júzege asyrylady. Jobanyń quny 191,7 mlrd teńge jáne jyl saıyn 110 mln tekshe metr aýyzsý berip, 72 MVt/saǵ elektr energııasyn óndirýdi kózdeıdi, – dedi N. Nurjigitov.

Buǵan deıin N. Nurjigitov sý dıplomatııasy Aral teńizin toltyrýǵa kómekteskenin aıtqan edi.