Qazaqstannyń SPEKA elderine eksporty 2025 jyly 15%-ǵa artty
ASTANA. KAZINFORM – Qazaqstannyń SPEKA elderimen saýda-ekonomıkalyq ózara is-qımyly turaqty oń dınamıkany kórsetip otyr, dep habarlaıdy QR Ulttyq ekonomıka mınıstrliginiń bapasóz qyzmeti.
Baspasóz qyzmetiniń málimetterine qaraǵanda, Qazaqstan Respýblıkasynyń Ulttyq ekonomıka vıtse-mınıstri Asan Darbaev BUU Ortalyq Azııa ekonomıkasyna arnalǵan Arnaıy baǵdarlamasy (SPEKA) ekonomıkalyq forýmynyń ashylýyna, sondaı-aq 2026 jylǵy 20-23 qańtar aralyǵynda Ashhabad qalasynda (Túrkimenstan) ótken SPEKA Basqarýshy keńesiniń 20-sessııasynyń jumysyna qatysty.
Forýmnyń ashylýynda sóz sóılegen Asan Darbaev Túrikmenstan úkimetine, sondaı-aq BUU Eýropalyq ekonomıkalyq komıssııasynyń jáne BUU Azııa men Tynyq muhıty ekonomıkalyq jáne áleýmettik komıssııasynyń hatshylyǵyna is-sharany joǵary uıymdastyrý deńgeıi men óńirlik ekonomıkalyq yntymaqtastyqty damytýdaǵy dáıekti jumysy úshin alǵys bildirdi. Ol SPEKA ózin saýda-ekonomıkalyq ıntegratsııany tereńdetýge, kólik baılanysyn damytýǵa jáne Ortalyq Azııada ornyqty damýdy ilgeriletýge yqpal etetin tıimdi óńirlik platforma retinde tanytqanyn atap ótti. Qazaqstan óz kezeginde saýda, logıstıka, turaqty ınfraqurylym jáne ınnovatsııa salasyndaǵy bastamalardy iske asyrýǵa belsendi qatysýǵa daıyn.
Іs-shara barysynda atap ótilgendeı, Qazaqstannyń SPEKA elderimen saýda-ekonomıkalyq ózara is-qımyly turaqty oń dınamıkany kórsetip otyr. 2025 jylǵy qańtar–qarashadaǵy qorytyndy boıynsha Qazaqstan men SPEKA elderi arasyndaǵy taýar aınalymy ótken jylǵy sáıkes kezeńmen salystyrǵanda 10,1%-ǵa artyp, 8,7 mlrd AQSh dollarǵa jetti. Qazaqstannan eksport 15%-ǵa, 6,7 mlrd AQSh dollaryna ósti. Bul qazaqstandyq óndirýshilerdiń óńirlik jetkizý tizbegine qatysýynyń artýyn kórsetedi.
Sondaı-aq jıynda Qazaqstannyń saýda rásimderin ońaılatý salasyndaǵy ilgerileýine erekshe nazar aýdaryldy. 2023 jyly Qazaqstan Dúnıejúzilik saýda uıymynyń saýda rásimderin ońaılatý týraly kelisimi mindettemesin tolyq kólemde oryndap, osy protsesti aıaqtaǵan óńirdegi sanaýly eldiń birine aınalǵany aıtyldy.
Qazaqstan bıznesti qoldaý úshin tsıfrlyq quraldy tabysty paıdalanyp otyr. Bıznestiń aqparatqa qol jetkizýin arttyrý maqsatynda Qazaqstanda tradeinfo.kz ulttyq saýda portaly jumys isteıdi. Ol ımporttyń, eksporttyń jáne tranzıttiń 80-nen astam rásimi sıpattamasyn qamtıdy. Portal BUU álemdegi eń úzdik saýda portaly dep tanyǵan Central Asia Gateway aımaqtyq platformasymen biriktirilgen.
Forým sońynda SPEKA sheńberindegi yntymaqtastyqty odan ári tereńdetý ózara saýdanyń ósýine ǵana emes, jalpy Ortalyq Azııa elderi ekonomıkasynyń turaqtylyǵy men básekege qabilettiligin arttyrýǵa yqpal etetini atap ótildi.