Qazaqstannyń soltústiginde úshinshi AES salynýy múmkin
ASTANA. KAZINFORM — Atom energııasy agenttiginiń tóraǵasy Almasadam Sátqalıev Qazaqstanda úshinshi AES salynýy múmkin alańdardy atady. Eldiń shyǵys jáne batys óńirlerimen qatar, soltústik bóligi de qarastyrylyp jatyr, dep habarlaıdy Kazinform agenttiginiń tilshisi.
Agenttik basshysy atap ótkendeı, atom salasyn 2050 jylǵa deıin damytý strategııasyna sáıkes, Qazaqstanda keminde úsh atom elektr stantsııasyn salý josparlanǵan. Onyń sózinshe, Almaty oblysynyń Jambyl aýdany atom elektr stantsııalaryn ornalastyrýǵa qolaıly aýmaqtardyń biri sanalady. Muny geologııalyq, gıdrologııalyq jáne basqa da zertteýlerdiń nátıjesi rastap otyr.
Al úshinshi atom elektr stantsııasynyń naqty qaı jerde salynatyny ázirge belgisiz.
– Qazaqstanda úshinshi atom elektr stantsııasyn salýǵa bolatyn birneshe aýmaq qarastyrylyp jatyr. Ázirge naqty sheshim qabyldanǵan joq. Degenmen elimizde ortasha qýatty reaktorlardy ornalastyrý áleýeti bar. Olar tutynýshylardy elektr energııasymen qatar, jylýmen de qamtamasyz ete alady. Keıbir jaǵdaıda sýdy tuşytýǵa da múmkindik beredi, – dedi Almasadam Sátqalıev Antalıada ótken «Álemdik atom kúnderi – 2026» forýmynda jýrnalısterge bergen suhbatynda.
Onyń aıtýynsha, stantsııa salynatyn oryndy tańdaǵanda elektr energııasyn tutyný kóleminiń bolashaqtaǵy ósimi men atom tehnologııalaryn keshendi qoldaný múmkindigi eskerilmek.
– Shyǵys Qazaqstandaǵy Kýrchatov qalasynyń aýmaǵyn zerttep jatyrmyz. Kaspıı teńiziniń jaǵalaýyndaǵy Batys Qazaqstan aýmaǵy da birqatar faktordy eskergende, stantsııa salýǵa qolaıly. Budan bólek, KEGOC júıelik operatorynyń usynysymen Soltústik Qazaqstandaǵy Tobyl ózeni mańyndaǵy aýmaq ta nazarǵa alyndy. Bul rette stantsııany salqyndatýǵa qajetti sý qorynyń jetkilikti bolýy eskerilip otyr. Jalpy, atalǵan aýmaqtardyń barlyǵynyń atom energetıkasyn damytýǵa áleýeti zor. Olardyń árqaısysy Qazaqstanda atom energetıkasyn damytýdyń kelesi kezeńderinde jan-jaqty zertteledi, – dedi agenttik basshysy.
Buǵan deıin Almasadam Sátqalıev Qazaqstanda úshinshi atom elektr stantsııasyn salýǵa qolaıly aýmaqtardy ataǵan bolatyn. Sol kezde stantsııa qurylysy úshin eldiń shyǵys jáne batys óńirleri qarastyrylyp jatqany aıtylǵan edi. Endi bul tizimge Qazaqstannyń soltústik óńiri de qosyldy.
Eske sala keteıik, buǵan deıin Qazaqstanda salynatyn alǵashqy eki atom elektr stantsııasynyń qurylysyna Reseı men Qytaı kompanııalary qatysatynyn jazǵan edik.