Qazaqstannyń soltústigin gazdandyrý máselesi qalaı sheshilip jatyr
PETROPAVL. KAZINFORM — Eldiń soltústigin gazdandyrý máselesi birneshe jyldan beri kóterilip keledi. Bul — turǵyndardyń ómir sapasyn arttyryp qana qoımaı, ekologııalyq jaǵynan da tıimdi bolmaq.
Energetıka mınıstrliginiń málimetinshe, qazirgi tańda bul máseleni sheshýdiń eki negizgi joly qarastyrylyp otyr — otandyq gaz resýrstary men Reseıden gaz ımporttaý.
Sonyń biri — «Saryarqa» jobasy. Bul magıstraldy gaz qubyrynyń 2 jáne 3 kezeńderi Aqmola men Soltústik Qazaqstan oblystaryn gazdandyrýdy kózdeıdi.
Alaıda bul kezeńderdi júzege asyrý «Beıneý — Bozoı — Shymkent» magıstraldy gaz qubyrynyń qýatyn arttyrýǵa tikeleı baılanysty.
Energetıka mınıstrliginiń aqparatyna sáıkes, «QazaqGaz» UK» AQ 2026 jyldyń sońyna deıin qatarlyq ınvestormen birlesip, «Beıneý — Bozoı -Shymkent» gaz qubyrynyń jelilik bóliginde qurylys-montajdaý jumystaryn bastaýdy josparlap otyr.
ıAǵnı, «Saryarqa» jobasynyń Petropavlǵa deıin kelýi bul jumystardyń tabysty júzege asýyna táýeldi.
— Sondaı-aq, soltústik jáne shyǵys óńirlerdi gazdandyrý máselesi boıynsha kelissóz Reseımen de belsendi túrde júrgizilip jatyr. Qazaqstan men Reseı arasynda 10 mlrd tekshe metr kóleminde gaz jetkizý múmkindigi qarastyrylyp otyr. Bul baǵytta kelissózder aıaqtalǵan joq. Qazirgi tańda gazdyń baǵasy men jetkizý sharttary kelisilip jatyr. Qubyr tartý jumystary taraptar arasyndaǵy kelisimder tolyq bekitilgen soń ǵana bastalmaq. Qazaqstandyq tarap daıyn, tek Reseıdiń naqty jaýabyn kútip otyr, — delingen vedomstvo aqparatynda.
Ótken jyldyń qorytyndysy boıynsha, el halqynyń 62,4% nemese 12,6 mln adam tabıǵı gazǵa qol jetkizgen. Bıyl da óńirlerdi gazdandyrý jumystary jalǵasady. Respýblıkalyq bıýdjetten 65,9 mlrd teńge bólinip, 45 joba júzege asyrylmaq.
Bul jobalar aıasynda elimizdiń 13 óńirindegi birqatar eldi mekenge tabıǵı gaz jetkizý josparlanǵan. Máselen, Aqmola oblysynda — 1, Atyraýda — 1, Jambylda — 17, Jetisýda — 21 eldi meken qamtylady. Nátıjesinde osy jyly 7 oblysta 36 myńnan astam adam gaz jelisine qosylady.
Respýblıkalyq bıýdjetten bólek «Samuryq-Qazyna» AQ qarajaty da osy maqsatqa baǵyttalmaq. Bul jobalardyń nátıjesinde qosymsha 218 myń adam tabıǵı gazǵa qol jetkizetin bolady.
Osylaısha paıdalanýshylar sany 12,8 mln adamǵa jetpek. Energetıka mınıstrligi gazdandyrý deńgeıin 2030 jylǵa qaraı 65 paıyzǵa jetkizýdi kózdep otyr.
Buǵan deıin Premer-Mınıstr Oljas Bektenov eldiń soltústigin gazdandyrý úshin «Saryarqa» qubyrynyń 2,3-kezeńderi salynatynyn aıtqan edi.