Qazaqstannyń Syrtqy ister mınıstri Shveıtsarııaǵa resmı saparmen barady
ASTANA. KAZINFORM — 2 jeltoqsanda Shveıtsarııa tarapynyń shaqyrýymen Qazaqstannyń Syrtqy ister mınıstri Ermek Kósherbaev Shveıtsarııa Konfederatsııasyna resmı sapar jasaıdy.
Sapar aıasynda Shveıtsarııanyń vıtse-prezıdenti, Ekonomıka, bilim jáne zertteýler federaldy departamentiniń basshysy Gı Parmelanmen, sondaı-aq Shveıtsarııanyń Syrtqy ister Federaldy departamentiniń basshysy Inıatsıo Kassıspen kelissózder josparlanǵan.
— Kezdesýler barysynda taraptar Qazaqstan-Shveıtsarııa ekijaqty yntymaqtastyǵynyń ózekti máselelerin qarastyrady jáne 2026 jyly Shveıtsarııanyń Eýropadaǵy qaýipsizdik jáne yntymaqtastyq uıymynda aldaǵy tóraǵalyǵy aıasynda kópjaqty kún tártibiniń negizgi aspektileri boıynsha pikir almasady. Oǵan qosa, Shveıtsarııanyń jetekshi isker toptarynyń ókilderimen kezdesýler josparlanyp otyr, — dedi QR Syrtqy ister mınıstrliginiń resmı ókili, Halyqaralyq aqparat komıtetiniń tóraǵasy Aıbek Smadııarov.
Sonymen birge, 28 qarashada Shveıtsarııa konfederatsııasynyń Vıtse-prezıdenti Gı Parmelannyń «Qazaqstan-Shveıtsarııa» iskerlik keńesiniń 5-shi otyrysyna qatysýy sheńberinde jumys sapary ótedi.
Іskerlik keńes «Qazaqstan temir joly» AQ jáne «Stadler Rail» tóraǵalyǵymen ótedi. Sharaǵa jetekshi shveıtsarııalyq jáne qazaqstandyq kompanııalar men salalyq qaýymdastyqtardyń ókilderi qatysady. Taraptar ekonomıkalyq yntymaqtastyqty keńeıtý perspektıvalaryn, ózara is-qımyldyń jańa baǵyttaryn jáne birlesken jobalardy iske asyrýdy talqylaıdy.
Aıta keteıik, 1 jeltoqsanda Syrtqy ister mınıstri Ermek Kósherbaev Qazaqstan — EO yntymaqtastyq keńesiniń HHІІ otyrysyna qatysý úshin Brıýsselge saparmen barady.
Buǵan deıin QR SІM ókili Eýropaǵa vıza talabyn jeńildetý jumysy kún saıyn júrip jatqanyn aıtqan edi.