Qazaqstannyń Syrtqy ister mınıstri Qytaıǵa resmı saparmen bardy
ASTANA. KAZINFORM – QR Syrtqy ister mınıstri Ermek Kósherbaev Qytaı Halyq Respýblıkasyna resmı saparmen bardy.
QR Syrtqy ister mınıstrliginiń habarlaýynsha, búgin Qazaqstannyń Syrtqy ister mınıstri Beıjińde Qytaı Kommýnıstik partııasy Ortalyq komıteti Saıası bıýrosynyń múshesi, Qytaı Halyq Respýblıkasynyń Syrtqy ister mınıstri Van Imen kezdesken.
Qazaqstan men Qytaı arasyndaǵy dıplomatııalyq qatynastar 1992 jyldyń 3 qańtarynda ornaǵan. Beıjińdegi Qazaqstan Respýblıkasynyń Elshiliginen bólek, Shanhaıda, Sıanda, Gýanchjoýda, Gonkong arnaıy ákimshilik aýmaǵynda konsýldyqtar ashylǵan jáne Úrimshide pasport-vıza qyzmeti jumys isteıdi.
Al Qazaqstan astanasynda Qytaı Halyq Respýblıkasynyń Elshiligi jáne Almaty men Aqtóbe qalalarynda QHR Bas konsýldyǵy qyzmet atqarady.
Negizgi saıası jetistikter qatarynda shekara máselesiniń tolyq rettelýi men ekijaqty qatynastardyń máńgilik jan-jaqty strategııalyq áriptestik deńgeıine kóterilýin aıtýǵa bolady. Qazaqstan Respýblıkasynyń Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy Sı Tszınpın resmı saparlar men túrli basqosýlarda 9 ret kezdesken.
2025 jylǵy qańtar-tamyz aılarynda eki el arasyndaǵy taýar aınalymy 21,1 mlrd dollarǵa jetken. Onyń ishinde: eksport – 9,4 mlrd dollar ımport – 11,7 mlrd dollar.
Qazaqstannan Qytaıǵa negizinen mıneraldyq ónimder, otyn-energetıkalyq taýarlar, metalldar jáne hımııa ónerkásibiniń ónimderi eksporttalady. Al Qytaıdan Qazaqstanǵa mashınalar, jabdyqtar, kólik quraldary, aspaptar men qurylǵylar, hımııa jáne oǵan baılanysty salalardyń ónimderi, metalldar men metall buıymdary, toqyma jáne tigin buıymdary, aıaq kıim, bas kıimder jáne galantereıa ımporttalady.
QR Ulttyq bankiniń málimetinshe, 2005-2025 jyldary Qytaıdyń Qazaqstan ekonomıkasyna salǵan tikeleı ınvestıtsııalarynyń jalpy kólemi 29,24 mlrd dollar bolǵan. Óz kezeginde Qazaqstan Qytaı ekonomıkasyna 918,9 mln dollar ınvestıtsııa salǵan.
Qytaı Qazaqstanǵa tartylǵan sheteldik ınvestıtsııalar kólemi jóninen 3-orynda tur (Nıderland – 2,28 mlrd $, Reseı – 1,14 mlrd $) jáne taza ınvestıtsııalar aǵyny boıynsha Qatardan keıin 2-orynda. Qazirgi tańda Qazaqstan-Qytaı birlesken ınvestıtsııalyq jobalarynyń biryńǵaı tizimine jalpy somasy 66,4 mlrd dollardan asatyn 224 joba engizilgen.
Qazirgi ýaqytta Qazaqstan men Qytaı arasynda 15 baǵyt boıynsha 83 áýe reısi ushady. Eki el azamattary jeke ister, týrızm, emdelý, halyqaralyq tasymal, tranzıt jáne iskerlik saparlar úshin 30 kúnge deıin vızasyz júre alady.
2025 jylǵy qańtardaǵy jaǵdaı boıynsha Qytaıda 4200 qazaqstandyq stýdent oqyp júr, onyń ishinde 459-y QHR úkimetiniń grantyn alǵan. Al Qazaqstanda 2089 qytaılyq stýdent oqıdy.
Qytaıdyń 7 joǵary oqý ornynda (Beıjiń, Shanhaı, Dalıan, Tıantszın, Sıan jáne Hanchjoý qalalarynda) «Qazaqstan ortalyqtary» ashylǵan. Beıjińde, Shanhaıda jáne Sıanda qytaı stýdentteri «qazaq tili men ádebıeti» mamandyǵy boıynsha bilim alady.
2024 jyl Qytaıda «Qazaqstan týrızm jyly» retinde ótti jáne byltyr Qytaıdan Qazaqstanǵa 655 myń týrıst keldi. Al 2025 jyl «Qytaı týrızm jyly Qazaqstanda» dep jarııalansa, 2026 jyl – Qazaqstan men Qytaı mádenıetiniń ózara jyly bolyp ótpek.
Eske sala ketsek, 23 qazanda Syrtqy ister mınıstri Ermek Kósherbaev RF Syrtqy ister mınıstri Sergeı Lavrovtyń shaqyrýymen Máskeýge resmı saparmen barǵan edi.
Sonymen birge, QR SІM Taıland pen Kambodja arasyndaǵy birlesken deklaratsııaǵa qatysty málimdeme jasady.