Qazaqstannyń Syrtqy ister mınıstri BUU Bas hatshysymen kezdesedi
ASTANA. KAZINFORM — Qyrkúıektiń 22-28 kúnderi AQSh-tyń Nıý-Iork qalasynda BUU Bas assambleıasynyń 81-sessııasynyń joǵary deńgeıdegi aptalyǵy ótedi. Qazaqstan delegatsııasyn Syrtqy ister mınıstri Muhtar Tileýberdi basqarady.
Syrtqy ister mınıstrliginiń resmı ókili Janbolat Úsenovtyń aıtýynsha, sessııanyń taqyryby — «Senimdi qalpyna keltirý. Ózgeristerdi basqarý. Barshaǵa qyzmet etetin BUU».
Kún tártibinde beıbitshilik pen qaýipsizdikti saqtaý, ornyqty damý maqsattaryna qol jetkizýdi jedeldetý, klımattyń ózgerýine qarsy is qımyl jáne qorshaǵan ortany qorǵaý sekildi máseleler bolady. Sonymen birge, adam quqyqtary, jańa tehnologııalar men jasandy ıntellektini basqarý, BUU reformasy da aptalyqtyń kún tártibinde kórsetilgen.
— Qazaqstan úshin joǵary deńgeıdegi aptalyq ulttyq jáne óńirlik bastamalardy ilgeriletý, ekijaqty baılanystardy nyǵaıtý jáne jahandyq ári óńirlik kún tártibindegi ózekti máseleler boıynsha birlesken sheshimder ázirleý turǵysynan mańyzdy alań bolyp sanalady, — dep atap ótti Janbolat Úsenov aptalyq brıfıngte.
Sapar baǵdarlamasy delegatsııa basshysynyń jalpy pikirtalas barysyndaǵy sóz sóıleýin, BUU Bas hatshysy Antonıo Gýtterıshpen kezdesýin, sondaı-aq BUU-ǵa múshe memleketterdiń syrtqy saıası vedomstvo basshylarymen, halyqaralyq uıymdardyń jetekshilerimen jáne sheteldik kompanııalardyń ókilderimen birqatar ekijaqty kezdesý ótkizýdi kózdeıdi.
Delegatsııa birneshe óńirlik uıymdar men kópjaqty birlestikterdiń beıresmı otyrystaryna, BUU Bas assambleıasynyń mandattyq is-sharalaryna, sondaı-aq Ortalyq Azııa elderi Syrtqy ister mınıstrleriniń konsýltatsııalaryna da qatysady.
Buǵan deıin QR SІM resmı ókili Grýzııada ruqsatsyz jumys istegender 5 jylǵa deıin elden shyǵarylýy múmkin ekenin aıtqan edi.
