Qazaqstannyń Syrtqy ister mınıstri Armenııaǵa jumys saparymen bardy
EREVAN. KAZINFORM – Jumys sapary aıasynda Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Armenııa Respýblıkasynyń Syrtqy ister mınıstri Ararat Mırzoıanmen kelissózder júrgizdi.
Taraptar saıası, saýda-ekonomıkalyq jáne mádenı-gýmanıtarlyq ózara is-qımyldyń basym baǵyttary boıynsha ekijaqty yntymaqtastyqtyń keń aýqymdy máselelerin talqylady. Halyqaralyq kún tártibindegi ózekti máseleler boıynsha pikir almasty.
«Armenııa – Qazaqstan úshin jaqyn memleket jáne ýaqyt synynan ótken senimdi seriktes. Qazirgi kezeńde Dostyq pen yntymaqtastyq týraly shart qazaq-armıan qarym-qatynastaryn keńeıtý men tereńdetýdiń berik negizin qalady, biz bıyl onyń 25 jyldyǵyn toılaǵaly otyrmyz. Bizdiń ortaq tustarymyz kóp jáne biz eki el halyqtarynyń ál-aýqaty men órkendeýi úshin ortaq maqsattarǵa qol jetkizý úshin kúsh salýǵa daıynbyz», – dep málimdedi QR SІM basshysy.
Dostyq, syılastyq jáne áriptestik negizinde memleketaralyq is-qımyldy odan ári tereńdetýge ózara mindetteme bildirildi. Asa joǵary jáne joǵary deńgeılerde saıası dıalogty odan ári nyǵaıtýdyń mańyzdylyǵy atalyp ótti.
Taraptar saýda-ekonomıkalyq yntymaqtastyq máselelerine erekshe nazar aýdardy. 2023 jyldyń qorytyndysy boıynsha ózara saýdanyń oń nátıjeleri baıqaldy, onyń kólemi 23,1%-ǵa ósip, 53 mln AQSh dollaryna jetti. SІM basshylary taýar aınalymynyń qazirgi deńgeıi qolda bar áleýetke sáıkes kelmeıtindigimen kelisti, osyǵan baılanysty jańa múmkindikterdi aıqyndaý úshin ortaq kúsh salýǵa jáne birlesken sheshimder qabyldaýǵa kelisti.
«Bizde 25 jyldyq seriktestikti qorytyndylaýǵa jáne eki eldiń ıgiligi úshin qarym-qatynastarymyzdyń jańa betin ashýǵa jaqsy múmkindik bar. Árıne, biz ózara is-qımylymyzdyń negizin keńeıtip jatyrmyz. Saıası dıalogymyzdyń joǵary deńgeıi bizdiń qarqyndy damyp kele jatqan saýda-ekonomıkalyq qatynastarymyzǵa qajetti alǵysharttardy kórsetedi. Biz kólik jáne logıstıkalyq baılanystardy damytýǵa múddelimiz», – dedi mınıstr A.Mırzoıan.
Suhbattastar sondaı-aq eki eldiń óndiristik jáne qarjylyq resýrstaryn biriktirý negizinde ınvestıtsııalyq saladaǵy yntymaqtastyqty damytý perspektıvalaryn talqylady. Joǵary tehnologııalar, tsıfrlandyrý, aýyl sharýashylyǵy ónimderin ózara jetkizý salalarynda, qurylys salasyndaǵy yntymaqtastyq kooperatsııa joldaryn belgiledi.
Saýda-ekonomıkalyq jáne ınvestıtsııalyq baılanystardy damytýǵa shaǵyn jáne orta bıznestiń qatysýyn oń baǵalap, Qazaqstanda armıan kapıtalynyń qatysýymen 435 kásiporyn, Armenııada qazaqstandyq kapıtaldyń qatysýymen 100-den astam kásiporyn jumys isteıtini atalyp ótti.
Taraptar mádenı-gýmanıtarlyq saladaǵy yntymaqtastyqtyń oń dınamıkasyn atap ótti.
Mádenıet, bilim, ǵylym salalaryndaǵy yntymaqtastyqty arttyrý boıynsha usynystarmen almasty. Qazaqstan men Armenııada Mádenıet kúnderin ózara uıymdastyrýǵa mańyzdy mán berildi.
Syrtqy ister mınıstrleri kelissózder qorytyndylaryna kóńili tolatynyn bildirip, odan ári jemisti yntymaqtastyqqa senim bildirdi.
Kelissózder nátıjesi boıynsha Qazaqstan men Armenııanyń syrtqy saıası vedomstvolary arasynda 2024-2025 jyldarǵa arnalǵan yntymaqtastyq baǵdarlamasyna qol qoıyldy.
