Qazaqstannyń syrtqy saýda aınalymy 7,9%-ǵa ulǵaıdy
ASTANA. KAZINFORM — Bıyl qańtar-sáýir aılarynda Qazaqstannyń syrtqy saýda aınalymy 44,9 mlrd AQSh dollaryn qurady. Bul byltyrǵy sáıkes kezeńimen salystyrǵanda 7,9%-ǵa joǵary.
Ulttyq statıstıka bıýrosynyń málimetinshe, esepti kezeńde eksport kólemi 24 mlrd AQSh dollaryna, al ımport kólemi shamamen 20,9 mlrd AQSh dollaryna jetti.
Atap aıtqanda, elimizdiń negizgi eksporttyq naryǵy — Qytaı. Esepti kezeńde bul elge 4,9 mlrd AQSh dollary kóleminde taýar jóneltildi. Sondaı-aq Italııaǵa — 4 mlrd dollar, Reseıge — 2 mlrd dollar, Túrkııaǵa — 1,7 mlrd dollar jáne Ózbekstanǵa — 1,4 mlrd dollar kóleminde ónim eksporttaldy.
Al ımport boıynsha Qazaqstannyń basty seriktesi — Reseı. Atalǵan elden jetkizilgen taýar kólemi 6,6 mlrd AQSh dollaryn qurady. Odan keıin Qytaı — 6 mlrd dollar, Germanııa — 1 mlrd dollar, AQSh — 0,9 mlrd dollar jáne Koreıa Respýblıkasy — 0,5 mlrd dollar kórsetkishpen ornalasqan.
Sonymen qatar vedomstvo deregine súıensek, 2026 jylǵy qańtar–sáýir aılarynda Qazaqstannyń Eýrazııalyq ekonomıkalyq odaq (EAEO) elderimen ózara saýda kólemi ósip, 9,87 mlrd AQSh dollaryna jetken. Ótken jyldyń sáıkes kezeńimen salystyrǵanda 13,3%-ǵa artty.
Onyń ishinde eksport kólemi 2,7 mlrd dollardy qurap, 7,9%-ǵa azaısa, ımport kólemi 7,16 mlrd dollarǵa jetip, 24,1%-ǵa ósti.
Osyǵan baılanysty Qazaqstannyń EAEO elderimen saýda aınalymynda Reseıdiń basym úlesi saqtalyp tur — 87,6%. Qyrǵyz Respýblıkasynyń úlesi — 8%, Belarýs Respýblıkasynyń úlesi — 4,1%, Armenııa Respýblıkasynyń úlesi — 0,3%.
Budan bólek, eksportta munaı men metall ónimderi basym. 2026 jyldyń alǵashqy tórt aıynda Qazaqstan eksportynyń negizgi bóligin bıtýmınozdy mıneraldardan alynǵan shıki munaı jáne shıki munaı ónimderi qurady. Onyń úlesi 44%-ǵa jetti.
Eksport qurylymynda tazartylǵan mys pen óńdelmegen mys qorytpalary — 7,5%, mys kenderi men kontsentrattary — 6,3%, ferroqorytpalar — 3,2%, bıdaı jáne meslın — 3% úleske ıe boldy.
Importtyń negizgi taýarlary qatarynda jeńil avtomobılder jáne ózge de motorly kólik quraldary (3,1%), munaı gazdary men ózge de gaz tárizdes kómirsýtekter (2,7%), dárilik zattar (2,6%), telefon apparattary (2,5%), elektr generatorlyq qondyrǵylar men elektr túrlendirgishteri (2,5%) bar.
Jalpy, 2026 jyldyń qańtar–sáýir aılaryndaǵy kórsetkishter Qazaqstannyń syrtqy saýda aınalymynyń oń dınamıkasyn saqtap otyrǵanyn jáne negizgi halyqaralyq seriktestermen ekonomıkalyq baılanystardyń nyǵaıǵanyn kórsetedi.
Aıta keteıik, Qazaqstanda jumyspen qamtylǵandardyń eń kóbi saýda salasynda eńbek etedi.
