Qazaqstannyń syrtqy rezervi 100 mlrd dollarǵa jaqyndady
Syrtqy ister mınıstriniń orynbasary Názıra Nurbaeva Azııadaǵy ózara is-qımyl jáne senim sharalary keńesiniń bıznes forýmynda uıymǵa múshe elderdi Qazaqstannyń logıstıkalyq jobalaryna belsendi atsalysýǵa úndedi, dep habarlaıdy Kazinform agenttigi.
«Geosaıasattaǵy kúrdeli landshaftqa qaramastan, bizdiń memleket ekonomıkanyń barlyq baǵyty boıynsha damý úrdisin kórsetip keledi. Byltyr Qazaqstannyń jalpy ishki ónimi 220 mlrd dollardan asty. Al shetelden rekordtyq kórsetkishte – 28 mlrd dollar tikeleı ınvestıtsııa tarttyq. Elimizdiń syrtqy taýar aınalymy da rekordtyq kórsetkishke jetip, 136 mlrd dollar boldy. Onyń ishinde eksporttyń úlesi – 84 mlrd dollar. Al ekonomıkalyq turaqtylyǵymyzdyń negizi – syrtqy rezervterimiz 100 mlrd dollarǵa jaqyndady», - dedi mınıstrdiń orynbasary.
Názıra Nurbaeva Qazaqstan ınvestıtsııa tartý baǵytynda Ortalyq Azııadaǵy kóshbasshy bolyp qala berýge nıetti ekenin atap ótti.
«Qazaqstannyń qolynda 1 mlrd adamnan asatyn tutynýshysy bar naryqtyń kilti bar. Onyń ishinde Eýrazııalyq ekonomıkalyq odaq elderiniń de, Ortalyq Azııanyń da, Qytaıdyń da naryǵy bar. Jańa geosaıası ahýal Orta dálizdi Eýropa men Azııa arasyndaǵy baılanysty nyǵaıtýdaǵy rólin mańyzdy ete túsýde. Bul – Ortalyq Azııa men Shyǵys Azııadan júk tasymaldaýdaǵy eń qysqa ári anaǵurlym ornyqty marshrýt. Byltyr Orta dáliz arqyly EAEO elderine jóneltilgen júk aǵyny eki ese artyp, 2,7 mln tonnaǵa jetti. Shyǵys pen batys arasyndaǵy saýda-sattyqtyń ósimin qoldaı túsý úshin AÓSShK-daǵy seriktesterimizben birlesip áreket etýge, Orta dálizdi Transeýropa kólik jelisimen jalǵaýǵa daıynbyz», - dedi vıtse-mınıstr.
