Qazaqstannyń syrtqy memlekettik boryshy 15,9 mlrd dollarǵa jetti
ASTANA. KAZINFORM — 10 aıdyń ishinde Qazaqstannyń memleket kepildik beretin boryshynyń jalpy kólemi 35 trln 503 mlrd 738 mln teńgege nemese 64 mlrd 695 mln dollarǵa jetken. Al 1 qańtarda bul kórsetkish 60 mlrd 813 mln teńge bolǵan edi.
Qarjy mınıstrligi taratqan statıstıkada syrtqy qaryzdyń jalpy somasy 10 aıdyń ishinde qalaı qubylǵany da kórsetilgen.
1 qańtarda syrtqy qaryz kólemi 15 mlrd 872 mln dollar (8 trln 309 mlrd 719 mln teńge) bolsa, 1 qazanda bul kórsetkish 15 mlrd 908 mln dollarǵa (8 trln 730 mlrd 379 mln teńge) jetken.
Syrttan qaraǵanda syrtqy boryshtyń jalpy somasy aıtarlyqtaı óspegenin kórýge bolady. Biraq bul Qazaqstan 10 ishinde syrttan aıtarlyqtaı qaryz tartqan joq degen sóz emes. Keıbir qaryzdardyń bir bóligin jaýyp, esesine keıbir qarjy ınstıtýttarynan boryshty belsendi tartqan. Mysaly, Halyqaralyq Qaıta qurý jáne Damý Banki, (3 mlrd 665 mln dollar), Azııa Damý Banki, 1 mlrd 465 mln dollar), Eýropa Qaıta qurý jáne Damý Banki (65 mln dollar), Islam Damý Banki (49 mln dollar), Japon halyqaralyq yntymaqtastyq agenttigi (149 mln dollar) sııaqty qarjy ınstıtýttarynyń aldyndaǵy qaryzyn ishinara azaıtsa, Germanııa Úkimetiniń kredıt agenttigi (5 mln dollar) men sheteldik kommertsııalyq bankter (200 mln dollar) aldyndaǵy boryshy jyl basyndaǵy deńgeıde saqtalǵan.
Al Azııa Infraqurylymdyq Investıtsııalar Banki (909 mln dollar), Qytaı Halyq Respýblıkasynyń Eksporttik-ımporttik banki (214 mln dollar) aldyndaǵy qaryzy men eýrooblıgatsııalar (8 mlrd 463 mln dollar), Reseı naryǵynda ornalastyrylǵan memlekettik qundy qaǵazdar (725 mln dollar) kólemi arta túsken.
Bul jerde Qarjy mınıstrligi syrtqy qaryz retinde memleket kepildik bergen boryshtardy ǵana esepke alyp otyrǵanyn aıtý kerek. Áıtpese halyqaralyq esepteýlerde eldiń syrtqy boryshy 170 mlrd dollardan asqany týraly derekter aıtylyp júr. Ulttyq banktiń baǵalaýy boıynsha da eldiń syrtqy qaryzy 172 mlrd 654 mln dollarǵa jetken.
Buǵan deıin de Qazaqstan qandaı qarjy ınstıtýttaryna qansha qaryz ekenin jazǵan edik.