Qazaqstannyń ShYU elderimen saýda aınalymy 72,6 mlrd dollarǵa jetti
ASTANA. KAZINFORM — 2025 jyly Qazaqstannyń Shanhaı yntymaqtastyq uıymyna (ShYU) múshe memlekettermen taýar aınalymy 72,6 mlrd AQSh dollaryn qurady. 2024 jyly bul kórsetkish 67,7 mlrd dollar bolǵan.
Qazaqstannyń ShYU elderine eksporty 30,7 mlrd dollardy, al ımport kólemi 41,8 mlrd dollar boldy.
Qazaqstannyń ShYU elderimen saýdasyndaǵy negizgi seriktesteri — Qytaı, Reseı, Ózbekstan jáne Qyrǵyzstan. 2025 jyly Qytaımen taýar aınalymy 34,2 mlrd dollar, Reseımen 27,4 mlrd dollar, Ózbekstanmen 4,8 mlrd dollar jáne Qyrǵyzstanmen 2,2 mlrd dollar boldy.
Qazaqstannan ShYU elderine eksporttalǵan negizgi taýarlardyń qatarynda ýran, mys kenderi men kontsentrattary, shıki munaı, mys jáne mys katodtary, tabıǵı gaz, bıdaı jáne ferroqorytpalar bar.
2025 jyly birqatar aýyl sharýashylyǵy jáne óńdeý ónerkásibi ónimderiniń eksporty ósti. Atap aıtqanda, janýarlarǵa arnalǵan azyq ónimderiniń eksporty 2,5 esege artyp, 614,9 mln dollarǵa jetti. Kúnbaǵys maıynyń eksporty 62,4%-ǵa ósip, 633,7 mln dollardy qurady. Bıdaı eksporty 17,1%-ǵa artyp, 1,13 mlrd dollarǵa jetti. Arpa eksporty 22%-ǵa, bıdaı uny 11,8%-ǵa, zyǵyr tuqymy 72,9%-ǵa ósti.
ShYU elderinen Qazaqstanǵa ımporttalatyn negizgi taýarlardyń qatarynda jeńil avtomobılder, avtomobıl kýzovtary, tabıǵı gaz, munaı ónimderi, altyn, esepteý mashınalary jáne avtomobılder men traktorlarǵa arnalǵan bólshekter bar.
Qazaqstannyń eksportynda ýran, mys keni men kontsentrattary, munaı, mys, tabıǵı gaz jáne bıdaı negizgi pozıtsııalardy saqtap otyr. Sonymen qatar kúnbaǵys maıy, janýarlarǵa arnalǵan azyq, un, arpa jáne basqa da aýyl sharýashylyǵy ónimderi boıynsha eksport kóleminiń ósýi qazaqstandyq ónimge syrtqy naryqtardaǵy suranystyń bar ekenin kórsetedi.
Aıta ketelik $78,6 mlrd bolatyn 215 joba Qazaqstannyń jańa ınvestıtsııalyq tsıklin qalyptastyryp jatqany týraly jazǵan edik.
