Qazaqstannyń shıkizattyq emes taýarlar eksporty 12 paıyz ósti
ASTANA. KAZINFORM – Saýda oryndarynda otandyq taýarlarǵa basymdyq beriledi. Bul týraly Saýda jáne ıntegratsııa mınıstri Arman Shaqqalıev málim etti.
- Azyq-túlikke jatpaıtyn sektorǵa toqtalsaq, bes aıdyń qorytyndysy boıynsha shıkizattyq emes taýarlar eksporty 12 paıyz ósip, 10 mlrd AQSh dollarynan astam boldy. Al ımport kólemi 4,4 paıyzǵa ǵana ósti. Qazaqstannyń ishki naryǵy otandyq óndirýshiler úshin suranystyń basty kózi bolyp qala beredi, - dedi A.Shaqqalıev Úkimet otyrysynda.
Onyń aıtýynsha, Saýda mınıstrligi ishki naryqta otandyq ónimniń úlesin keńeıtý jónindegi sharalardy iske asyryp jatyr. Memlekettik qoldaý sharalaryn eskere otyryp, zańnamada otandyq azyq-túlik taýarlary úshin sóre keńistiginiń keminde 50 paıyzyn, al azyq-túlikke jatpaıtyn taýarlar úshin keminde 30 paıyzyn bólý kózdelgen.
- Qosymsha quqyqtyq ózgerister ázirlendi. Otandyq ónimniń úlesi árbir taýar sanatynda qamtamasyz etiledi. Bul qazaqstandyq ónimniń usynylýyn arttyrýǵa múmkindik beredi. Otandyq taýarlar saýda oryndarynyń eń suranysqa ıe sórelerinde ornalastyrylyp, «Qazaqstanda jasalǵan» belgisimen tańbalanady. Bul otandyq taýarlarǵa suranysty arttyrady. Oǵan qosa «Jańa óndirýshiler» úshin sóreler men «jasyl sóreler» kózdelgen. Osyǵan uqsas talaptar Kaspi, Halyk Market, Clever, TEEZ jáne taǵy basqa otandyq elektrondyq saýda alańdarynda engizilip jatyr. Zańmen saýda jelileriniń otandyq óndirýshilermen jetkizý sharttaryn jasasýdan negizsiz bas tartýy tyıym salyndy. Biz saýda jelilerimen jyl saıyn memorandýmdar jasaımyz. Onda otandyq ónimdi ilgeriletý jónindegi naqty mindettemeler qamtylǵan, - dedi vedomstvo basshysy.
Aıta keteıik, Qazaqstanda shilde aıynyń qorytyndysy boıynsha áleýmettik mańyzy bar azyq-túlik taýarlarynyń baǵasy 0,3% tómendedi.
