Qazaqstannyń shıkizattyq emes eksporty: metallýrgııa salasy kósh bastady

ASTANA. KAZINFORM – 2024 jyly Qazaqstannyń shıkizattyq emes ónimderi arasynda eksporttyń eń joǵary ósimin metallýrgııa salasy kórsetti. Atap aıtqanda eksport kólemi 16,9 mlrd AQSh dollaryna jetti, dep habarlaıdy Kazinform agenttigi.

– 2024 jyly shıkizattyq emes salalar arasynda eksporttyń eń joǵary ósimin, sózsiz, metallýrgııa salasy kórsetti. Onyń eksport kólemi 16,9 mlrd AQSh dollaryn qurady. Bul kórsetkish ony óńdeýshi ónerkásiptiń barlyq baǵyttarynyń ishinde absolıýtti kóshbasshy etti. Bul – qazaqstandyq metall ónimderiniń básekege qabilettiligi joǵary ekenin jáne olarǵa syrtqy suranystyń turaqty ekenin kórsetedi, – dep habarlady Saýda jáne ıntegratsııa mınıstrligi Kazinform agenttiginiń resmı saýalyna jaýap retinde.

Mınıstrlik derekterine sáıkes, Qazaqstan búginde senimdi azyq-túlik ónimderin jetkizýshi retinde óz pozıtsııasyn nyǵaıtyp keledi. Ásirese kórshiles elder jáne Taıaý Shyǵys elderi naryǵynda alar orny bólek. Osynyń arqasynda azyq-túlik ónerkásibiniń eksporty 2,8 mlrd AQSh dollaryna jetti.

Sondaı-aq, mashına jasaý salasyn atap ótken jón – onyń eksporty 2,2 mlrd. AQSh dollaryn qurady.

Hımııa jáne munaı-hımııa ónerkásibi de eleýli úles qosty: olardyń eksport kólemi tıisinshe 1,9 jáne 1,5 mlrd AQSh dollaryna jetti.

– Bul eki sala el eksportyn ártaraptandyrýda mańyzdy ról atqarady. Osylaısha, 2024 jyly shıkizattyq emes taýarlardyń eksportynda óńdeýshi sektorlar turaqty ósim kórsetti, bul Qazaqstandaǵy ındýstrııalandyrý men óńdeýdi damytý jónindegi strategııalyq maqsattarǵa saı keledi, – dep málimdedi mınıstrlik.

Aıta keteıik, buǵan deıin Qazaqstan qandaı shıkizat emes taýarlardy eksporttaıtynyn jazdyq.