Qazaqstannyń shyǵys óńirlerinde sý qoımalary men kanaldar qaıta jańǵyrtylady
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov azamattardy qabyldap, onlaın formatta qazaqstandyqtardy tolǵandyrǵan suraqtarǵa jaýap berdi. Kezdesý barysynda Shyǵys Qazaqstan, Pavlodar jáne Abaı oblystarynda sýarmaly eginshilikti damytý máseleleri qaraldy. Bul týraly vedomstvonyń baspasóz qyzmeti málim etti.
Atap aıtqanda, sýarý sýyn jetkizý aýmaǵyn ulǵaıtý esebinen aýyl sharýashylyǵyn damytý joldary talqylandy. Nurjan Nurjigitovtiń aıtýynsha, qazirgi ýaqytta Pavlodar oblysynda lımandy sýarý júıelerin qalpyna keltirý jumystary júrgizilip jatyr. Sý resýrstary jáne ırrıgatsııa mınıstrligi barlyq qajetti qarajatty bóldi. Sonymen qatar elimizdiń shyǵys óńirlerinde sý sharýashylyǵy ınfraqurylymyn aýqymdy túrde qaıta jańǵyrtýǵa daıyndyq júrip jatyr.
– Qazirgi ýaqytta Abaı jáne Shyǵys Qazaqstan oblystarynda sý qoımalaryn, sondaı-aq magıstraldyq jáne sharýashylyqaralyq kanaldardy tolyq qalpyna keltirý jáne rekonstrýktsııalaý boıynsha jobalaý-smetalyq qujat ázirlenýde. Jobalardy ázirleý kelesi jyldyń birinshi toqsanynda aıaqtalady. Biz qurylys jáne montaj jumystaryn 2026 jyldyń sońyna deıin bastaýdy kózdep etemiz. Mınıstrlik pen oǵan qarasty uıymdar osy baǵytta jumys júrgizip jatyr, – dedi Sý resýrstary jáne ırrıgatsııa mınıstri Nurjan Nurjigitov.
Azamattardy qabyldaý barysynda sý qorǵaý aımaqtary men beldeýlerindegi zańsyz qurylysqa qarsy kúres máseleleri de qaraldy. Sondaı-aq basseındik keńesterdiń jumys tıimdiligin arttyrý jóninde usynystar aıtyldy.
Buǵan deıin habarlanǵandaı, ǵalymdar Syrdarııa ózeni basseıninde aýqymdy zertteý júrgizip jatyr.