Shekaradan zańsyz esirtki ótkizbek bolǵan azamat 7 jylǵa bas bostandyǵynan aıyryldy

ASTANA. KAZINFORM — Psıhotroptyq zatty kontrabandaǵa, ıaǵnı ony Qazaqstan Respýblıkasynyń Memlekettik shekarasy arqyly zańsyz ótkizgeni úshin kináli dep tanylǵan azamattyń isin Joǵarǵy Sottyń qylmystyq ister jónindegi sot alqasy qarady. 

Sot alqasy H. psıhotroptyq zatty kontrabandaǵa, ıaǵnı ony Qazaqstan Respýblıkasynyń Memlekettik shekarasy arqyly zańsyz ótkizgeni úshin kináli dep tanydy (QK 286-baby 5-tarmaǵynyń 2-bóligi). Ol 7 jylǵa bas bostandyǵynan aıyryldy. 

«Taǵylǵan aıypqa sáıkes, H. ózimen birge psıhotroptyq zatty alyp, 2023 jylǵy 11 aqpanda saǵat 18.20 shamasynda, Qazaqstan Respýblıkasynyń Memlekettik shekarasyndaǵy shekara beketi arqyly ótken. Saǵat 18.40-ta Baqylaý-ótkizý pýnktinde shekaralyq baqylaýdan ótý kezinde H.-nyń bas kıiminde tintý barysynda psıhotroptyq zat tabylǵan jáne tárkilengen», — delingen habarlamada. 

Joǵarǵy Sottyń qylmystyq ister jónindegi sot alqasy qylmystyq is materıaldaryn zertteı kele, H. pasporttyq baqylaýdan saǵat 18.20-da emes, saǵat 18.03-te ótkenin atap ótti, bul beınejazbamen rastalady.

Ol sondaı-aq H.-ǵa jaqyn jerde qyzmettik ıt ótkenin kórsetedi. 

«Kúdikti H. saǵat 18.34-te shekaralyq baqylaý qyzmetkerleriniń súıemeldeýimen Kedendik baqylaý aımaǵynan qaıta oralyp, saǵat 18.39-da pasporttyq baqylaýdan qaıta ótkeni beınejazbaǵa túsip qalǵan», — dep habarlady Joǵarǵy Sottyń baspasóz qyzmeti. 

Osydan keıin 21.57 saǵattan 21.09 saǵatqa deıin júrgizilgen tintý barysynda H.-nyń bas kıiminen 6 tabletka tabylǵan. Mundaı jaǵdaılarda H.-nyń pasporttyq baqylaýdan eki ret ótkeni jáne Qazaqstan Respýblıkasynyń aýmaǵynda «psıhotroptyq zatpen baılam» tapqany týraly aıǵaqtaryna tıisti quqyqtyq baǵa berilmedi. 

Joǵaryda aıtylǵandardyń negizinde Joǵarǵy Sot H.-ǵa qatysty sot aktileriniń kúshin joıyp, isti jańa qaraýǵa jiberdi.