Qazaqstannyń senimdi qurylys kompanııalary men ınvestorlary kelgenin qalaımyz - Aleksandr Výchıch
ASTANA. KAZINFORM - Aleksandr Výchıch qonaqjaılyq tanytqany úshin Prezıdent Qasym-Jomart Toqaevqa alǵys aıtyp, Belgrad Astanamen san qyrly yntymaqtastyqty odan ári keńeıtýge daıyn ekenin rastady, dep habarlaıdy Aqordanyń baspasóz qyzmeti.
Serbııa Prezıdenti qazaqstandyq kompanııalardyń ortaq jobalarǵa, ásirese, qurylys salasyna qosar úlesin arttyrýǵa múddeli ekenin jetkizdi.
– Biz Qazaqstan usynǵan birqatar bastamalardy júzege asyrýǵa ázirmiz. Bul Serbııada ǵana emes, Eýropanyń atalǵan aımaǵyndaǵy mańdaıaldy jobalar bolmaq. Sondaı-aq qazaqstandyq SCAT kompanııasyna áýe keńistiginde besinshi deńgeıli erkindik berý máselesi áli sheshimin tapqan joq. Ortaq is-qımyl arqyly atalǵan máseleni sheshe alatynymyzǵa senimdimin. Serbııaǵa Qazaqstannyń senimdi qurylys kompanııalary men ınvestorlary kelgenin qalaımyz. Bul elimizdiń ınvestıtsııalyq tartymdylyǵyn jaqsartyp qana qoımaı, ózara mádenı, týrıstik baılanystardy jandandyrýǵa da septigin tıgizedi. Óz tarapymyzdan Sizdiń elińizdiń ekonomıkasyna ınvestıtsııa salǵysy keletin serbııalyq kásipkerlerdi yntalandyrýǵa barynsha kúsh-jiger jumyldyramyz, – dedi Aleksandr Výchıch.
Serbııa Prezıdenti qorǵanys ónerkásibi, jasandy ıntellekt, derekterdi óńdeý ortalyǵy sekildi baǵyttarda ózara yqpaldastyqty arttyrýǵa zor áleýet bar ekenine nazar aýdardy.
Sonymen qatar ol Qazaqstannyń áleýmettik-ekonomıkalyq damýyndaǵy jetistikterdi joǵary baǵalap, muny álemdegi ósip-órkendeýdiń úlgisi dep atady.
Kelissóz barysynda ekijaqty kún tártibindegi ózekti taqyryptar, atap aıtqanda, saýda-ınvestıtsııa, kólik-logıstıka, aýyl sharýashylyǵy, asa mańyzdy mıneraldar, tsıfrlandyrý, jasandy ıntellekt, qurylys jáne týrızm salalaryndaǵy yqpaldastyq máseleleri qarastyryldy.
Osyǵan deıin Qazaqstan men Serbııa beıbit atom energetıkasy boıynsha tájirıbe almasý múmkindigin qarastyratyny týraly jazdyq.
