Qazaqstannyń saýda kásiporyndary Respýblıka kúnine oraı arnaıy usynystar ázirledi
ASTANA. KAZINFORM- Qazaqstanda Respýblıka kúnine oraı uıymdastyrylǵan Republic Day jáne Bereke Fest respýblıkalyq aktsııalary júrip jatyr. Qazirgi tańda Republic Day aktsııasyna 232 saýda-oıyn-saýyq ortalyǵy, saýda ortalyǵy men saýda úıi qosylsa, Bereke Fest aktsııasyna 417 saýda jelisi qatysyp jatyr.
QR Saýda jáne ıntegratsııa mınıstrligi baspasóz qyzmetiniń habarlaýynsha, eki aktsııa aıasynda elimizdiń barlyq óńirinde taýarlardyń jekelegen sanattaryna 50%-ǵa deıin jeńildik qarastyrylǵan.
Aktsııalarǵa daıyndyq aldyn ala bastaldy. Qazaqstan Respýblıkasy Saýda jáne ıntegratsııa mınıstrligi jergilikti atqarýshy organdarmen jáne aýmaqtyq departamenttermen birlesip, saýda uıymdarymen úılestirý jumystaryn júrgizip, uıymdastyrý máselelerin pysyqtady jáne qatysýshylardyń ózara is-qımylyn qamtamasyz etti.
Bastamaǵa otandyq óndirýshiler men saýda kásiporyndary da qosylyp, satyp alýshylarǵa arnaıy usynystar daıyndady.
-Respýblıka kúni – barshamyz úshin mańyzdy mereke. Qazaqstandyq brend retinde biz aktsııany qýana qoldadyq. Merekege oraı taýarlardyń jekelegen túrlerine 20% jeńildik belgiledik, – dedi MSQ dúkeniniń dırektory Ǵazıza Aldanova.
«Anvar» saýda jelisiniń menedjeri Erkejan Muhamadıevanyń aıtýynsha, satyp alýshylar sút ónimderine, jarmalar men kókónisterge qyzyǵýshylyq tanytyp otyr.
-Biz aktsııaǵa bir aı boıy daıyndaldyq. Seriktesterimizben birlesip, birqatar taýardy belgiledik. Sórelerdegi taýarlar azaıa bastaǵan saıyn ony jedel tolyqtyryp otyramyz. Aktsııaǵa qatysatyn taýarlar Bereke Fest arnaıy japsyrmasymen belgilengen, – dedi sýpermarket dırektory Juldyz Esimbetova.
Aktsııalar halyqqa Respýblıka kúnin merekeleý kezeńinde túrli taýarlardy arnaıy usynystarmen satyp alýǵa múmkindik beredi. Al saýda uıymdary úshin bul bastamalar qosymsha tutynýshy tartýǵa, suranysty qanaǵattandyrýǵa jáne taýar aınalymyn kúsheıtýge baǵyttalǵan.
Republic Day jáne Bereke Fest respýblıkalyq aktsııalary 2026 jylǵy 27 qazanǵa deıin jalǵasady.
Osyǵan deıin 600-den astam saýda nysany Republic Day jáne Bereke Fest aktsııalaryna qosylǵany týraly jazdyq.
