«Qazaqstannyń salaýatty qalalary» atty alǵashqy respýblıkalyq forým ótedi

ASTANA. KAZINFORM - 13 qazanda Astanada «Qazaqstannyń salaýatty qalalary» atty alǵashqy respýblıkalyq forým ótedi.

Densaýlyq saqtaý mınıstrligi málimetinshe, bul aýqymdy is-shara elimizdiń qalalaryn «Salaýatty qalalar» ulttyq jelisine biriktirýdiń negizgi alańy bolmaq. Forým zamanaýı tájirıbelermen bólisýge, tıimdi strategııalardy talqylaýǵa jáne jaıly, saý ári turaqty qalalyq ortany qalyptastyrý boıynsha birlesken sheshimderdi ázirleýge múmkindik ashady. Forýmnyń maqsaty – Qazaqstan qalalaryna «Qazaqstannyń salaýatty qalalary» ulttyq jelisine qosylýda ádistemelik jáne uıymdastyrýshylyq qoldaý kórsetetin myqty respýblıkalyq platformany qurý.

Forým aıasynda tórt taqyryptyq plenarlyq sessııa ótedi.

«Salaýatty qala: turaqty damýdyń strategııasy» – jeliniń uǵymy men maqsattarymen tanystyrý, Dúnıejúzilik densaýlyq saqtaý uıymynyń jahandyq bastamasyndaǵy Almatynyń tájirıbesi, densaýlyq faktory retinde buqaralyq sportty damytý.

«Bolashaq urpaqtyń bilimi men densaýlyǵy» — mektepterdiń balalar densaýlyǵyn nyǵaıtýdaǵy róli, fızıkalyq belsendilikti yntalandyrý, jastar ortalyqtary arqyly jasóspirimderdiń psıhıkalyq densaýlyǵyn qoldaý.

«Barlyq jasqa arnalǵan qala» – «Salaýatty ýnıversıtetter», «Salaýatty jumys oryndary» bastamalary jáne belsendi uzaq ómir súrý ortalyqtary – ınklıýzıvti qalalyq saıasattyń negizi.

«Seriktestik jáne sektoralyq ózara is-qımyl» – ÚEU men bıznestiń salaýatty ómir saltyn qalyptastyrý men halyq densaýlyǵyn nyǵaıtýdaǵy úlesi.

Forým bastamanyń damý múmkindikteri týraly pikirtalaspen qorytyndylanyp, elimizde jobany júzege asyrýǵa arnalǵan jol kartasyn qabyldaý týraly rezolıýtsııany bekitýmen aıaqtalady.

Aıta keteıik, «Jibek Joly» telearnasynyń «Taza qala» baǵdarlamasy Kýrchatov qalasyna at basyn burdy. Baǵdarlama júrgizýshileri dástúrge saı shahardyń kórikti jerlerin aralap, birqatar túıtkildi tustardy nazardan tys qaldyrmady.