Qazaqstannyń robototehnıkadan ulttyq qurama komandasy jasaqtaldy
ASTANA. KAZINFORM — Astanada Ortalyq Azııadaǵy eń iri robototehnıka jáne STEM-tehnologııalary festıvali Alem Tech Fest 2026 jeńimpazdary men júldegerleri marapattaldy, dep habarlaıdy Oqý-aǵartý mınıstrliginiń baspasóz qyzmeti.
Festıvalge Qazaqstan, Qyrǵyzstan, Ózbekstan, Túrikmenstan, Estonııa, Vetnam jáne Gonkongtan 5 myńnan astam oqýshy qatysty.
Marapattaý rásimine QR Premermınıstriniń orynbasary — Aqparattyq tehnologııalar jáne tsıfrlyq damý mınıstri Jaslan Madıev, «Samuryq-Qazyna» AQ Basqarma Tóraǵasy Nurlan Jaqýpov jáne salalyq mınıstrlikter men uıymdardyń ókilderi qatysty.
QR Premer-mınıstriniń orynbasary Jaslan Mádıev jastardyń ınjenerlik áleýetin joǵary baǵalap, atap ótti.
— Robototehnıkany damytý — elimizdiń tsıfrlyq transformatsııasynyń mańyzdy baǵyty. Búgin biz tek konstrýktorlarmen aınalysyp júrgen oqýshylardy emes, bolashaq ınjenerler men jasandy ıntellekt salasynyń mamandaryn kórip otyrmyz. Dál osy daryndy jastar ozyq tehnologııalardy ónerkásip pen memlekettik basqarý salasyna engizip, elimizdiń jahandyq naryqtaǵy básekege qabilettiligin arttyrady, — dedi Mádıev.
Festıval baǵdarlamasynyń negizgi bóligi Central Asia FIRST Championship týrnıriniń qorytyndysy boıynsha 50 úzdik komanda anyqtalyp, olarǵa aqshalaı syılyqtar men bilim granttary berildi.
Sonymen qatar, 16 úzdik jeńimpaz-komandalardan Qazaqstannyń ulttyq qurama komandasy jasaqtaldy. Ulttyq qurama komandasy Hıýston qalasynda (AQSh) ótetin FIRST Championship 2026 álemdik fınalynda el namysyn qorǵaıdy. Qalǵan júldeger-komandalar Soltústik Amerıka, Eýropa jáne Ońtústik-Shyǵys Azııadaǵy halyqaralyq týrnırlerge joldama aldy.
Qazaqstan ulttyq quramasyna kelesi komandalar endi:
FIRST LEGO League Explore: Alem Innovators;
FIRST LEGO League Challenge: FIZTEX, ToleBi Daryn, Tidal Tumble;
FIRST Tech Challenge: JelToqSun, TGJ, xCeption, SANA, KAP, Panheya, OVERTIME, Nomadic.Dragons.FTC, FIZMAT ROBOTICS, FoxSlide, MLP, Celestial.
Sonymen qatar, festıval aıasynda Alem Drone League, RoboCup Soccer, Physical AI Championship, RoboCup Rescue jáne Battle of Bots baǵyttary boıynsha jarystar ótkizildi.
Іs-sharany Oqý-aǵartý mınıstrliginiń qoldaýymen, USTEM Foundation qoǵamdyq qory jáne «Daryn» respýblıkalyq ǵylymı-praktıkalyq ortalyǵy uıymdastyrdy. Seriktes uıymdar retinde QR Jasandy ıntellekt jáne tsıfrlyq damý mınıstrligi, Astana Hub halyqaralyq ınnovatsııalyq klasteri, sondaı-aq QR Qorǵanys mınıstrligi at salysty.
Budan buryn elordada 5000-nan astam oqýshy robototehnıka saıysynda kúsh synasyp jatqanyn jazǵanbyz.