Qazaqstannyń Reseımen birlesken «Báıterek» jobasy aıaqtalýǵa jaqyn

ASTANA. KAZINFORM — Reseı Syrtqy ister mınıstri Sergeı Lavrov atalǵan joba Qazaqstanda ulttyq ǵarysh baǵdarlamasyn qurýǵa yqpal etetinin málimdedi.

— Qazaqstan-reseılik «Báıterek» jobasy aıaqtalý satysyna jaqyn. Bul joba Qazaqstanda ulttyq ǵarysh baǵdarlamasyn qurýǵa yqpal etedi. Bizdiń josparymyzda perspektıvaly zymyran tasýshy «Soıýz 5»-ti birlesip ushyrý bar, — dedi Reseıdiń vedomstvo basshysy.

Lavrov sondaı-aq Máskeý osy jyly maýsymda qabyldanǵan AES qurylysyn júrgizýge jaýapty halyqaralyq konsortsıýmnyń jetekshisi retinde reseılik «Rosatom» korporatsııasyn tańdaý sheshimin qoldaǵanyn aıtty.

— Men áriptesime osy saladaǵy barlyq mindetterdi merziminde jáne tolyq kólemde oryndaýǵa daıyn ekenimdi aıttym. Qazir profıldik vedomstvolar arqyly tehnıkalyq qarjylyq parametrler men zańdyq máseleler qaralyp jatyr, — dedi Lavrov.

Lavrov sondaı-aq Reseı Qazaqstannyń jetekshi saýda seriktesi ekenin atap ótti.

Mınıstrdiń aıtýynsha, birlesken jylý jáne gıdroenergetıkalyq jobalar arqyly energetıkalyq qaýipsizdikti ilgeriletýge úlken kóńil bólinedi.

-Biz mádenı-gýmanıtarlyq baılanystardy joǵary baǵalap, Qazaqstandaǵy reseılik ýnıversıtetter fılıaldarynyń jelisin damytý máselesin talqyladyq, bul ózara protsess bıyl bastalǵan. Máselen, qyrkúıekte Ombyda ál-Farabı atyndaǵy Qazaq ulttyq ýnıversıtetiniń fılıaly stýdentterge esigin aıqara ashty. Qazaqstan men Reseıde birlesken oqý oryndaryn ashý jumystary júrgizilip jatyr, — dedi ol.

Eske sala keteıik, buǵan deıin Reseı Syrtqy ister mınıstri Sergeı Lavrov Ermek Kósherbaevpen kezdesý barysynda Qasym-Jomart Toqaevtyń Reseıge jasaıtyn memlekettik saparyna daıyndyq júrip jatqanyn, bul sapar halyqaralyq deńgeıdegi mańyzdy oqıǵa bolatynyn aıtqan edi.