Qazaqstannyń Reseıdegi Elshisi men Astrahan oblysynyń basshysy ekijaqty yntymaqtastyqty talqylady
MÁSKEÝ.KAZINFORM — Qazaqstannyń Reseıdegi elshisi D. Abaevtyń Astrahan oblysyna jumys sapary ótti. Osy sapar aıasynda dıplomat Astrahan qalasynda (Reseı) ótken 10-shy Kaspıı medıaforýmynda sóz sóılep, sondaı-aq atalmysh Reseı óńiriniń basshysymen kezdesti, dep habarlaıdy agenttik tilshisi.

Forýmnyń plenarlyq otyrysynda sóz sóılegen dıplomat sharanyń «Kaspıı tarıhy: ótkennen bolashaqqa» taqyrybyn asa ózekti dep atap ótti. Ol medıaforýmnyń 10 jyl ishinde óziniń qajettiligi men tıimdiligin dáleldep, is-sharaǵa qatysýshy elderdiń medıa qaýymdastyqtary úshin mańyzdy baılanys alańyna jáne ashyq dıalog pen birlesken sheshimder qabyldaý platformasyna aınalǵanyn eske saldy.

Sonymen qatar, Astrahan oblysyna barǵan saparynda Elshi óńir gýbernatory Igor Babýshkınmen kezdesti. Eki tarap elder arasyndaǵy óndiristik kooperatsııa, ınvestıtsııa jáne logıstıka, kemesazdyq jáne týrızm salalaryndaǵy yntymaqtastyq máselelerin talqylady. Kúzde Oral qalasynda ótetin Qazaqstan men Reseıdiń aımaqaralyq yntymaqtastyq forýmyn eskere otyryp, shekara mańy yntymaqtastyǵyna erekshe kóńil bólindi.
Ózara saýdanyń kólemin arttyrýda «Atyraý — Astrahan» avtojolynyń kúrdeli jóndeý jumystarynyń aıaqtalýy men «Qurmanǵazy» ótkizý pýnktin qaıta jańartý oń áserin tıgizýi tıis. Taraptar Astrahan men Atyraý oblystary arasyndaǵy shekarada kólik-logıstıka habyn salý máselesine qyzyǵýshylyq tanytty.

Saýda baılanystaryn jáne kólik ınfraqurylymyn nyǵaıtýdy «Soltústik-Ońtústik» halyqaralyq korıdorynyń damýy da qoldaıdy, oǵan Astrahan oblysynyń logıstıkalyq múmkindikteri paıdalanylady. Osyǵan baılanysty Elshi aımaqtyń mańyzdy tranzıt núkteleri sanalatyn jergilikti porttardyń jumysymen tanysty.
Eske sala keteıik, buǵan deıin Reseı Qazaqstan aýmaǵynda jańa munaı aıdaıtyn stansa salýy múmkin ekenin jazǵan edik.