Qazaqstannyń iri kásiporyndaryna JI tehnologııalaryn engizý máselesi talqylandy

ASTANA. KAZINFORM – Búgin Premer-mınıstrdiń birinshi orynbasary Roman Sklıardyń tóraǵalyǵymen Qazaqstannyń iri ónerkásiptik kásiporyndarynyń qyzmetine jasandy ıntellekt (JI) tehnologııalaryn engizý máseleleri boıynsha jıyn ótti.

Oǵan ortalyq memlekettik organdar, ulttyq kompanııalar, salalyq birlestikter jáne iri ónerkásiptik kásiporyndardyń basshylary qatysty. Kún tártibinde iri ónerkásiptik kásiporyndarda jasandy ıntellektini engizýdiń aǵymdaǵy mártebesi, tsıfrlyq tehnologııalar men jasandy ıntellekt negizinde óńdeýshi ónerkásipti damytý, ónerkásipte jasandy ıntellektini qoldaný tájirıbesi jáne ony odan ári damytý josparlary qaraldy.

«Jasandy ıntellektini engizý – bul jaı ǵana tehnologııalardy jańǵyrtý emes, búkil ekonomıka úshin strategııalyq qadam. Qazaqstan óz ónerkásibiniń álemdik naryqtaǵy básekege qabiletti jeke saraptamasy men sheshimderin qalyptastyrýy tıis», - dep atap ótti Roman Sklıar.

Otandyq tehnologııalyq sheshimderdi engizýge, sondaı-aq ozyq álemdik tájirıbemen almasýdy qamtamasyz etýge erekshe nazar aýdaryldy. 

Josparlanǵan sharalardy júzege asyrý óndiristik úderisterdiń tıimdiligi men qaýipsizdigin arttyrýǵa ǵana emes, sonymen qatar tehnologııalyq jańǵyrtýǵa, ónimdiliktiń ósýine jáne Qazaqstannyń ındýstrııalyq damý kóshbasshylary qataryndaǵy pozıtsııasyn nyǵaıtýǵa turaqty negiz qalyptastyrýǵa múmkindik beredi.

Aıta keteıik, buǵan deıin Memleket basshysy jasandy ıntellekt memlekettik organdardyń jumys tıimdiligin arttyratynyn aıtqan bolatyn.