Qazaqstannyń iri qalalarynda túnde ekspress-marshrýttar qatynaýy múmkin
ASTANA. KAZINFORM – Qazaqstannyń iri qalalarynda týrısterdiń jaılylyǵy men qaýipsizdigin arttyrý maqsatynda áýejaılar men qala ortalyǵy arasynda túngi ekspress-marshrýttardy iske qosý josparlanyp otyr. Bul týraly QR Úkimeti málim etti.
Týrızm jáne sport mınıstriniń aıtýynsha zańsyz taksı qyzmetteri – keń taralǵan másele.
– Halyqaralyq áýejaılarda QR-kod júıesi engizildi. Onda senimdi taksı, qonaqúıler, elektrondy sım-kartalar men týrıstik nysandar týraly aqparat kórsetiledi. Ákimdikter bul jumysty turaqty túrde qadaǵalap, túsindirý jumystaryn júrgizip otyrýy kerek. Qajet bolsa, zań buzýshylarǵa qatysty jaýapkershilikti kúsheıtý múmkindigi de qarastyrylýy qajet, – delingen habarlamada.
Sondaı-aq iri halyqaralyq qalalardaǵy sekildi túngi ýaqytta áýejaıdan qala ortalyǵyna avtobýs qatynasy joq. Bul máseleni sheshý úshin túngi ekspress-marshrýttardy iske qosý usynyldy.
Eske sala keteıik, buǵan deıin Qazaqstanda 5 juldyzdy qansha qonaqúı bar ekenin jazǵan edik.