Qazaqstannyń Ózbekstanǵa salatyn ınvestıtsııasyn odan ári yntalandyrýǵa nıettimiz — Memleket basshysy

TAShKENT. KAZINFORM — Memleket basshysy Ózbekstan Prezıdentimen kelissóz barysynda saıası jáne ekonomıkalyq baılanystardy jandandyra túsetin jańa baǵyttar aıqyndalǵanyn jetkizdi. Bul týraly Aqordanyń baspasóz qyzmeti habarlady. 

– Ózara yntymaqtastyq áleýetin tolyq paıdalanýdy quptaımyz. Sondyqtan osy baǵytta tabandy eńbek etýge daıyn ekenimizdi aıttyq. Eń áýeli, saýda-ekonomıka salasyna erekshe mán berý kerek. Saýda-sattyqty damytý úshin ósimniń tyń múmkindikterin izdeý, taýarlar nomenklatýrasyn keńeıtý jáne shıkizattyq emes eksportty yntalandyrý sharalaryn qabyldaý qajet. Osy oraıda Ózara taýar aınalymyn arttyrý baǵdarlamasyn sapaly júzege asyrý mańyzdy. Búgin qurylatyn Óńir basshylary keńesin, sondaı-aq Іskerlik keńes pen «UzKazTrade» birlesken saýda kompanııasy sekildi basqa da ekijaqty mehanızmderdiń jumysynan naqty nátıje kútemiz, – dedi Qazaqstan Prezıdenti.

Memleket basshysynyń aıtýynsha, aýyl sharýashylyǵy salasyndaǵy yntymaqtastyqtyń áleýeti zor. Qasym-Jomart Toqaev qarapaıym saýdadan góri et, bıdaı, maıly daqyldardy óńdeýdiń tolyq óndiristik tizbesin qalyptastyrýdy, mal sharýashylyǵy men organıkalyq egin sharýashylyǵyn birge damytýdy usyndy. Buǵan qosa Prezıdent ónerkásip kooperatsııasyna úlken úmit artady.

– Qazirgi kezde jalpy somasy bir jarym mıllıard dollardan (1,7 mlrd dollar) asatyn 78 birlesken jobamyz bar. Onyń aıasynda 15 myńnan astam jumys ornyn ashý kózdelgen. Atalǵan jobalar tolyq iske assa, ekonomıkalyq jáne ınvestıtsııalyq yqpaldastyǵymyz aıtarlyqtaı kúsheıedi. Búgin biz olardyń bir parasyn iske qosamyz. Qazaqstannyń Ózbekstanǵa salatyn ınvestıtsııasyn odan ári yntalandyrýǵa nıettimiz. Bul rette ózbek dostarymyzdan ádettegideı qoldaý kútemiz. Qurylysy júrip jatqan «Ortalyq Azııa» halyqaralyq ónerkásip kooperatsııasy ortalyǵy ındýstrıaldyq qýatymyzdy odan ári arttyrýda mańyzdy ról atqarady, – dedi Qasym-Jomart Toqaev. 

Aıta ketelik Memleket basshysy Ózbekstan Prezıdenti Shavkat Mırzıeevpen kelissóz júrgizgeni týraly jazǵan edik.