Qazaqstannyń Ózbekstandaǵy keden qyzmeti ókiline qandaı mindet júkteledi
ASTANA. KAZINFORM — Quryltaı otyrysynan keıingi brıfıngte Qarjy mınıstri Mádı Takıev Qazaqstannyń Ózbekstandaǵy keden qyzmeti ókili qandaı mindetter atqaratynyn túsindirdi.
Eske salaıyq, buǵan deıin «Qazaqstan Úkimeti men Ózbekstan Úkimeti arasyndaǵy Qazaqstan Respýblıkasy men Ózbekstan Respýblıkasynyń keden qyzmeti ókildikterin ashý týraly kelisimdi ratıfıkatsııalaý týraly» zań eki oqylymda qaralyp qabyldanǵanyn jazǵanbyz.
Osyǵan baılanysty, Qarjy mınıstri ókili nemen aınalysatynyn málimdedi. Onyń aıtýynsha, ókil Qazaqstannyń Ózbekstandaǵy elshiligi janynda jumys isteıdi. Ol úshin jeke keńse ashý josparlanbaǵan.
– Taýar aınalymynyń artyp kele jatqanyn kórip otyrmyz. Sondyqtan keden organdarynan ádistemelik qoldaý kórsetetin ókil qajet, – dedi Mádı Takıev.
Qazaqstandyq ókildiń Ózbekstandaǵy negizgi mindeti jergilikti keden organdarymen ózara is-qımyl jasaý bolmaq. Ol júkterdi tasymaldaý kezinde týyndaıtyn máselelerdi sheshýge kómektesip, qazaqstandyq kásipkerlerge jedel aqparat berip otyrady.
– Qıyndyqtardyń sebepteri ártúrli bolýy múmkin. Másele árdaıym kedenniń nemese ótkizý pýnktiniń jumysyna baılanysty bola bermeıdi. Mysaly, joldyń jabylýyna nemese aýa raıy jaǵdaılaryna baılanysty qozǵalys shektelýi múmkin. Ókil kásipkerlerge aqparatty jedel jetkize alady. Bul qazirgi tártippen salystyrǵanda ózara is-qımyldy jedeldetedi, – dedi mınıstr.
Aıta keteıik, buǵan deıin Qazaqstan men Ózbekstan arasyndaǵy taýar aınalymyn 10 mlrd dollarǵa jetkizý josparlanyp otyrǵanyn jazǵanbyz.
