Qazaqstannyń Ózbekstandaǵy Elshisi Saıda Mırzıeevamen kezdesti
ASTANA. KAZINFORM – Qazaqstannyń Ózbekstandaǵy elshisi Beıbit Atamqulov Ózbekstan Prezıdentiniń kómekshisi Saıda Mırzıeevamen kezdesti. Bul týraly Daryo.uz jazdy.
Kezdesýde elder arasyndaǵy strategııalyq áriptestik pen odaqtastyq qatynastardy odan ári nyǵaıtý máseleleri talqylandy.
– Mádenı-gýmanıtarlyq yntymaqtastyqty talqylaı otyryp, biz aldaǵy birlesken is-sharalardy, sonyń ishinde Álisher Naýaı atyndaǵy teatrdyń Astana men Almaty qalalaryna shyǵarmashylyq gastroldik saparlary, QR Ulttyq mýzeıi men Ábilhan Qasteev atyndaǵy óner murajaıyndaǵy kórmeler, sondaı-aq Túrkistanda jastar forýmyn uıymdastyrý týraly pikir almastyq, – dep jazdy Prezıdent kómekshisi Telegram paraqshasynda.
Ózbekstan men Qazaqstan basshylarynyń nazary men qoldaýynyń arqasynda bul sharalardyń joǵary deńgeıde ótýi baýyrlas halyqtar arasynda qalyptasqan dostyqty odan ári nyǵaıtýǵa qyzmet etetinine senim bildirildi, delingen habarda.
Aıta keteıik, ótken jyl tamyz aıynda Astanada Álisher Naýaı eskertkishi saltanatty túrde ashylǵan bolatyn. Іs-sharaǵa Qasym-Jomart Toqaev pen Shavkat Mırzıeev qatysty.
Sondaı-aq bıyl Abaı Qunanbaıulynyń 180 jyldyǵy Ózbekstanda keń aýqymda atalyp ótpek.