Qazaqstannyń ońtústik óńirlerinde kóktemgi egis naýqany aıaqtalýǵa jaqyn
ASTANA. KAZINFORM — El óńirlerinde shamamen 2,1 mln gektar aýyl sharýashylyǵy alqaptary egildi, dep habarlaıdy Aýyl sharýashylyǵy mınıstrliginiń baspasóz qyzmeti.
Kóktemgi dala jumystary agrotehnıkalyq merzimderge sáıkes júrgizilip jatyr. Egis naýqany ásirese elimizdiń ońtústik óńirlerinde qarqyndy júrip jatyr. Máselen, Túrkistan oblysynda — 449,2 myń ga, Jambyl oblysynda — 306 myń ga, Jetisý oblysynda — 292,6 myń ga, Almaty oblysynda — 187,9 myń ga jerge egin egildi. Basqa óńirlerde de egis jumystary bastaldy: Shyǵys Qazaqstan oblysynda — 156,3 myń ga, Abaı oblysynda — 138,8 myń ga, Qostanaı oblysynda — 85 myń ga, Aqmola oblysynda — 74,8 myń ga, Qyzylorda oblysynda — 52,5 myń ga, Pavlodar oblysynda — 56,9 myń ga, sondaı-aq basqa aımaqtarda da egis júrip jatyr.
Kóktemgi dala jumystaryna daıyndyq aıasynda kelesi is-sharalar atqaryldy: 16,7 mln ga jerde ylǵal jabyldy, 6,1 mln ga alqapta sebýge deıingi óńdeý júrgizildi, 1,7 mln ga jerde kóktemgi jyrtý jumystary oryndaldy.
Búgingi tańda 942,1 myń ga jerge dándi daqyldar, 242,8 myń ga jerge mal azyqtyq daqyldar, 492 myń ga jerge maıly daqyldar, 118,8 myń ga jerge maqta, 71,8 myń ga jerge kókónister, 57,7 myń ga jerge baqsha daqyldary, 32,5 myń ga jerge kartop, 15,6 myń ga jerge qant qyzylshasy, 26,3 myń ga jerge kúrish jáne basqa daqyldar egildi.
— Egis naýqanyn ýaqtyly ári tıimdi ótkizý úshin 866,8 myń tonna mıneraldy tyńaıtqysh jetkizýge sharttar jasaldy. 254 teńge/lıtr baǵamen (naryqtyq baǵadan 15% tómen) 401 myń tonna dızel otyny bólindi. Bıylǵy jylǵa arnalǵan tuqym qajettiligi 2,3 mln tonnany quraıdy. Qamtamasyz etilý deńgeıi — 100%. Zerthanalyq tekseris nátıjesinde tuqymnyń 99%-y kondıtsııalyq dep tanyldy, — delingen mınıstrlik habarlamasynda.
Aıta keteıik, aýyl sharýashylyǵy mınıstrligi kóktemgi egis naýqanynyń barysyna monıtorıng júrgizýdi jalǵastyryp, óńirlerge qajetti ádistemelik jáne uıymdastyrýshylyq qoldaý kórsetip keledi.
Buǵan deıin Aqmola oblysy aýyl sharýashylyǵy sanaǵyna daıyndalyp jatqany habarlandy.